កាលពីថ្ងៃអង្គារ ប្រទេសគុយបា បានប្រកាសពីវិធានការដែលបន្ធូរបន្ថយវិធានការរឹតត្បិតលើពលរដ្ឋរបស់ខ្លួន ដែលកំពុងរស់នៅបរទេស ខណៈប្រទេស​កុម្មុយនិស្ត​មួយនេះ នៅបន្តរកវិធីដោះស្រាយការធ្វើអន្តោប្រវេសន៍ច្រើនមិនធ្លាប់មានទៅកាន់សហរដ្ឋ។

ក្រសួងការបរទេស និយាយថា លិខិតឆ្លងដែននឹងមានសុពលភាពរយៈពេល១០ឆ្នំាជំនួសឲ្យរយៈពេល៦ឆ្នំា សម្រាប់ប្រជាជន​គុយបា​មានអាយុលើសពី១៦ឆ្នំា និងកាត់ចំណាយច្រើនជាងពាក់កណ្តាលពាក់ព័ន្ធ​ទៅនឹងការបន្តថ្មីចំពោះឯកសារធ្វើដំណើរចេញក្រៅកោះនេះ។

ក្រសួងបានលុបចោលតម្រូវការដែលថា ប្រជាជនគុយបាចំណាយបង់ថ្លៃសេវាកម្មរៀងរាល់២ឆ្នាំ ទោះបីជានៅមុនពេលលិខិតឆ្លង​ដែនរបស់ពួកគេផុតកំណត់ក៏ដោយ ដើម្បីរក្សាបានស្ថានភាព​សកម្មរបស់ពួកគេ។

លោក Ernesto Soberon នាយកកិច្ចការកុងស៊ុលរបស់ក្រសួងការបរទេសគុយបា បាននិយាយថា ច្បាប់ថ្មី ចូលជាធរមាននៅថ្ងៃទី១ ខែកក្កដា។ លោកបាននិយាយថា វិធានការជាច្រើន​ត្រូវបានផ្តោត​លើការពង្រឹងទំនាក់ទំនងជាមួយសហគមន៍គុយបានៅបរទេស។

ប្រទេសគុយបាក្នុងរយៈពេលច្រើន​ទសវត្សរ៍​មកនេះ ​បាន​កំណត់​ការធ្វើ​និរប្រវេសន៍(ចាកចេញពីប្រទេសកំណើតទៅប្រទេសដទៃ) ​នៃពលរដ្ឋរបស់ខ្លួន ហើយប្រជាជនគុយបាជាច្រើនដែលកំពុងរស់នៅបរទេសបាន​ត្អូញត្អែរ​ពីការរារាំងដែលបានអនុវត្ត និងតម្លៃថ្លៃលើសលប់ សម្រាប់ការភ្ជាប់ និងបន្តថ្មីឯកសារធ្វើដំណើរជាមួយប្រទេសកំណើត​របស់ខ្លួន។

យោងតាមទិន្នន័យគយ និងអង្គភាពល្បាតព្រំដែនអាមេរិក ​បានឲ្យដឹងថា ប្រជាជនគុយបា ជាង៣សែននាក់ ​បានមកដល់ព្រំដែនអាមេរិកកាលពីឆ្នាំមុន ​ជាការធ្វើអន្តោប្រវេសន៍ច្រើនបំផុត ក្នុងពេលមានវិបត្តិសេដ្ឋកិច្ចដែលពុំធ្លាប់កើតមានពីមុនមក។