សភានៅក្នុងតំបន់គាំទ្ររុស្ស៊ីរបស់ប្រទេសម៉ុលដូវ៉ា កាលពីថ្ងៃអង្គារបានផ្តល់ការគាំទ្រ​ការ​បោះឆ្នោតមេដឹកនាំតំបន់មានបំណងជំរុញទំនាក់ទំនងជាមួយទីក្រុងមូស្គូ ជាចំណាត់ការមួយដែលនាំទៅរកការប៉ះទង្គិចគ្នាជាមួយរដ្ឋាភិបាលគាំទ្រអឺរ៉ុបរបស់ប្រទេសនេះ។

ម៉ុលដូវ៉ា ជារដ្ឋក្រីក្រ និងតូច ជាប់ព្រំដែនជាមួយប្រទេសអ៊ុយក្រែន និងរ៉ូម៉ានី បានរិះគន់ការឈ្លានពានរបស់រុស្ស៊ី និងបានចោទប្រកាន់ទីក្រុងមូស្គូពីការព្យាយាម បង្កអស្ថិរភាពដល់រដ្ឋបាលប្រធានាធិបតី លោកស្រី Maia Sandu ។

តំបន់ Gagauzia ប្រទេសម៉ុលដូវ៉ាភាគខាងត្បូង បានបោះឆ្នោតអ្នកដឹកនាំថ្មី កាលពីចុងសប្តាហ៍​កន្លងទៅ​នេះក្នុងការប្រកួតប្រជែងដែលបានបង្ហាញបក្ខជនគាំទ្ររុស្ស៊ី។

សភាបានគាំទ្រលទ្ធផលនោះ ប៉ុន្តែនាយករដ្ឋមន្ត្រីប្រទេសម៉ុលដូវ៉ា និងមន្ត្រីជាច្រើនរូបទៀត បាន​និយាយថា ​អាជ្ញាធរ​មជ្ឈិម​នឹង​ព្យាយាមទុកជាមោឃៈនូវលទ្ធផលលើភស្តុតាង​នៃភាពមិនប្រក្រតី​ដែលរាលដាល។

នាយករដ្ឋមន្ត្រីលោក Dorin Recean និយាយថា ​លទ្ធល​នេះពុំមានភាពច្បាស់លាស់។

លោកស្រី Yevgeniya Gutul អ្នកដឹកនាំថ្មី ចង់បានមិត្តភាពបន្ថែមទៀត​ជាមួយទីក្រុងមូស្គូ។ លោកស្រីតំណាងឲ្យ គណបក្ស Sor ដែលរយៈពេលជាច្រើនខែមកនេះបានធ្វើការតវ៉ាទាមទារការឲ្យ​លោកស្រីប្រធានាធិបតី លោកស្រី Sandu​លាលែងពីតំណែង។

ដោយទទួលបានឯករាជ្យរយៈពេលជាង៣០ឆ្នាំ ​ប្រទេសម៉ុលដូវ៉ា ​បានប្រព្រឹត្តទៅដោយមាន​ក្រុមផ្តាច់ខ្លួន​គាំទ្ររុស្ស៊ី នៅតំបន់ Transdniestria​ នៅភាគខាងកើត ហើយមានការមិនពេញ​ចិត្តជារឿយៗ​នៅក្នុងតំបន់ Gagauzia មានជនជាតិភាគតិចទួរគីរស់នៅច្រើន ដែលគាំទ្រដល់​ព្រះវិហារនិកាយអថូដុករបស់រុស្ស៊ី ​និងមានគណបក្សមួយចំនួនដែលគាំទ្រដោយរុស្ស៊ីយូរ​មកហើយ។