សភាជាតិរបស់ប្រទេសអេក្វាឌ័រ កាលពីថ្ងៃអង្គារ បានចាប់ផ្តើមសវនាការលើការចោទប្រកាន់ប្រឆាំងនឹងប្រធានាធិបតីលោក Guillermo Lasso ដែលអាចនឹងបណ្តេញចេញពីតំណែង ទោះបីជាដំណើរការនេះ បង្កើនលទ្ធភាពដែលថារូបលោកនឹងរំលាយសភា ដើម្បីបញ្ចៀសការបោះឆ្នោតចុងក្រោយក៏ដោយ។

សំឡេងឆ្នោត ៩២សំឡេង ពីសភាដែលមានសមាជិក ១៣៧រូប ជាតម្រូវការជាចាំបាច់ ដើម្បីបញ្ចប់តួនាទីរបស់លោក Lasso ដែលអ្នកនយោបាយប្រឆាំងនិយាយថា មិនយកចិត្តទុកដាក់ចំពោះការព្រមានអំពីការកេងបន្លំទាក់ទងនឹងកិច្ចសន្យានៅក្រុមហ៊ុនដឹកជញ្ជូនប្រេងរបស់រដ្ឋFlopec ។

លោក Lasso បដិសេធចោលការចោទប្រកាន់នេះ ដោយនិយាយថា រដ្ឋបាលរបស់លោកបានធ្វើការផ្លាស់ប្តូរលើកិច្ចសន្យា ដែលបានចុះហត្ថលេខាជាច្រើនឆ្នាំ មុនពេលរូបលោកចូលកាន់តំណែង។ ដើម្បីផ្តល់ផលប្រយោជន៍ដល់រដ្ឋ តាមការណែនាំពីអ្នកត្រួតពិនិត្យរបស់ប្រទេសអេក្វាឌ័រ។

លោក Lasso បាននិយាយខណៈកំពុងធ្វើការការពារ ដោយសំដៅទៅលើគូប្រជែងរបស់លោកថា៖ «ពួកគេបានបង្កើតស្ថានភាពប្រឌិតមួយដែលមិនអាចដោះស្រាយបញ្ហានានារបស់ប្រទេស ឬអ្នកណាផ្សេងបានឡើយ។ ការចងកំហឹងដូចដែលពួកគេចោទប្រកាន់ខ្ញុំ គឺជាភស្តុតាងដ៏ធំបំផុត ដែលបញ្ជាក់ពីភាពគ្មានកំហុសរបស់ខ្ញុំ»។

ដើម្បីបញ្ចៀសបានការចោទប្រកាន់ទម្លាក់តំណែងនេះ លោក Lasso អាចអំពាវនាវឲ្យមាន​មធ្យោបាយចុងក្រោយ ដែលគេហៅថា «មរណៈពីរផ្លូវ» គឺលក្ខណៈដោយឡែកខាងរដ្ឋធម្មនុញ្ញ ដែលអនុញ្ញាតឲ្យប្រធានាធិបតីអេក្វាឌ័រ អំពាវនាវឲ្យមានការបោះឆ្នោតមុនកាលកំណត់ សម្រាប់ទាំងតំណែងរបស់ប្រធានាធិបតីទាំងរដ្ឋសភា ក្នុងកាលៈទេសៈជាក់លាក់មួយ ដូចជានៅពេលដែលអង្គនិតិប្បញ្ញាត្តិរារាំងដល់ដំណើរការរបស់រដ្ឋាភិបាល៕