មន្រ្តីក្នុងស្រុកនិយាយថា មនុស្សជាង ៣០នាក់ ត្រូវបានសម្លាប់ អំឡុងការប៉ះទង្គិចគ្នារវាងក្រុមអ្នកចិញ្ចឹមសត្វ និងក្រុមកសិករនៅរដ្ឋភាគកណ្តាល Plateau ប្រទេសនីហ្សេរីយ៉ា ។

លោក Dan Manjang គឺជាស្នងការទទួលបន្ទុកព័ត៌មាន និងទំនាក់ទំនងរដ្ឋ Plateau បាននិយាយ​ប្រាប់ទីភ្នាក់ងារព័ត៌មាន AFPថា ការប៉ះទង្គិចគ្នា បានកើតឡើងកាលពីថ្ងៃចន្ទ រវាងក្រុម អ្នកចិញ្ចឹមសត្វដែលភាគច្រើនគឺជាជនមូស្លីម និងក្រុមកសិករដែលជាគ្រិស្តសាសនិក ។

ក្រុមនគរបាល និយាយថា អំពើហិង្សា បានកើតឡើងនៅតាមភូមិជាច្រើនក្នុងឃុំ Bwoi ស្ថិតក្នុងស្រុក Mangu ។

ខណៈពេលនោះដែរ ក្បួនរថយន្តសហរដ្ឋអាមេរិក រងការវាយប្រហារនៅក្នុងប្រទេសនីហ្សេរីយ៉ា កាលពីថ្ងៃអង្គារ ដោយបានសម្លាប់មនុស្ស ៤នាក់ ដែលរួមទាំងបុគ្គលិក ២នាក់មកពីស្ថានកុងស៊ុលសហរដ្ឋអាមេរិក និងមន្រ្តីនគបាល ២នាក់ ហើយនិងចាប់ជម្រិតមនស្ស ៣នាក់ផ្សេងទៀត ។

ការវាយប្រហារនេះដែរ បានកើតឡើងនៅរដ្ឋភាគអាគ្នេយ៍ Anambra ដោយមេបញ្ជាការរដ្ឋមួយនេះ និយាយប្រាប់ CNNថា ក្រុមវាយប្រហារ បានធ្វើឃាតមន្រ្តីនគរបាល ២នាក់ និងបុគ្គលិក ២នាក់មកពីស្ថានកុងស៊ុលសហរដ្ឋអាមេរិក និងបានដុតសាកសព និងរថយន្តរបស់ពួកគេចោល ។

យោងតាមសេតវិមាន និងនគរបាលក្នុងស្រុក បានឲ្យដឹងថា បុគ្គលិកដែលត្រូវបានសម្លាប់ទាំងនេះ ពុំមែនជាពលរដ្ឋអាមេរិកនោះទេ។

លោក John Kirby ដែលជាមន្រ្តីក្រុមប្រឹក្សាសន្តិសុខជាតិសហរដ្ឋអាមេរិក និយាយថា គ្មានពលរដ្ឋសហរដ្ឋអាមេរិកណាម្នាក់ ជាប់ពាក់ព័ន្ធនឹងករណីសម្លាប់នេះឡើយ ហេតុដូច្នេះហើយ គ្មានពលរដ្ឋអាមេរិកណាម្នាក់ រងគ្រោះនោះឡើយ ៕