កាលពីថ្ងៃទី១៦ ខែឧសភា ទីក្រុងមូស្គូបាននិយាយថា ឧបនាយករដ្ឋមន្ត្រីរុស្ស៊ីលោក Alexander Novak ទទួលបន្ទុកផ្នែកការទូតថាមពល បានចាប់ផ្តើមដំណើរទស្សនកិច្ចទៅកាន់ប្រទេសអ៊ីរ៉ង់កាលពីថ្ងៃអង្គារ ហើយបានសង្កត់ធ្ងន់លើអត្ថប្រយោជន៍នៃកិច្ចសហប្រតិបត្តិការបន្ថែមទៀតនៅក្នុងវិស័យប្រេង និងឧស្ម័ន។

ទាំងរុស្ស៊ី និងអ៊ីរ៉ង់ ដែលស្ថិតនៅក្រោមទណ្ឌកម្មលោកខាងលិច កំពុងបង្កើតទំនាក់ទំនងជិតស្និទ្ធជាងមុន ដើម្បីគាំទ្រសេដ្ឋកិច្ចរបស់ពួកគេ និងបំផ្លាញដល់ទណ្ឌកម្មរបស់លោកខាងលិច ដែលភាគីទាំងពីរបានចាត់ទុកថាមិនស្របច្បាប់។

រដ្ឋាភិបាលរុស្ស៊ីបាននិយាយនៅក្នុងសេចក្តីថ្លែងការណ៍មួយថា លោក Novak បានជួបជាមួយរដ្ឋមន្ត្រីក្រសួងប្រេងឥន្ធនៈអ៊ីរ៉ង់ លោក Javad Owji ហើយក៏បានទៅជួបក្រុមហ៊ុនផលិតឧបករណ៍ប្រេង និងឧស្ម័នមួយចំនួន និងបានពិភាក្សាអំពីទស្សនៈវិស័យក្នុងការធ្វើការរួមគ្នាក្នុងវិស័យប្រេងឥន្ធនៈ ថាមពល និងការដឹកជញ្ជូន។

សេចក្តីថ្លែងការណ៍នោះបានបន្ថែមថា ភាគីទាំងពីរក៏បានពិភាក្សាអំពីកិច្ចសហប្រតិបត្តិការក្នុងវិស័យថាមពលអគ្គិសនី និងនុយក្លេអ៊ែរ ក៏ដូចជាប្រភពថាមពលកកើតឡើងវិញផងដែរ ប៉ុន្តែមិនបានផ្តល់ព័ត៌មានលម្អិតនោះទេ៕