កម្មវិធីបរិស្ថានរបស់អង្គការសហប្រជាជាតិ (UNEP) បាននិយាយនៅក្នុងរបាយការណ៍ថ្មីមួយកាលពីថ្ងៃចន្ទថា ប្រទេសនានា អាចកាត់បន្ថយកង្វក់ប្លាស្ទិកបាន ៨០% នៅត្រឹមឆ្នាំ ២០៤០ ដោយប្រើបច្ចេកវិទ្យាដែលមានស្រាប់ និងតាមរយៈការធ្វើការផ្លាស់ប្តូរគោលនយោបាយសំខាន់ៗ។

ស្ថាប័នអង្គការសហប្រជាជាតិដែលមានមូលដ្ឋាននៅប្រទេសកេនយ៉ា បានចេញផ្សាយការវិភាគរបស់ខ្លួនអំពីជម្រើសគោលនយោបាយ ដើម្បីដោះស្រាយវិបត្តិសំណល់ប្លាស្ទិកពីរសប្តាហ៍មុនពេលបណ្តាប្រទេសនានាកោះប្រជុំនៅទីក្រុងប៉ារីស សម្រាប់ការចរចាជុំទីពីរដើម្បីតាក់តែងសន្ធិសញ្ញាសកលមួយដែលមានគោលបំណងលុបបំបាត់កាកសំណល់ប្លាស្ទិក។

របាយការណ៍នោះផ្តោតលើការផ្លាស់ប្តូរទីផ្សារសំខាន់ៗចំនួនបីដែលត្រូវការដើម្បីបង្កើតគំរូសេដ្ឋកិច្ច "រាងជារង្វង់" ដែលបន្តដំណើរការផលិតទំនិញជាលក្ខណៈជុំបានយូរតាមដែលអាចធ្វើទៅបានមានដូចជា ការប្រើប្រាស់ឡើងវិញ ការកែច្នៃឡើងវិញ និងការតម្រង់ទិសឡើវិញនៃការវេចខ្ចប់ចាប់ពីផ្លាស្ទិករហូតដល់វត្ថុធាតុដើមជំនួស។

កម្មវិធី UNEP ប៉ាន់ប្រមាណថា ការលើកកម្ពស់ជម្រើសនៃការប្រើប្រាស់ឡើងវិញរបស់រដ្ឋាភិបាលដូចជាប្រព័ន្ធដបទឹកដែលអាចបំពេញទឹកឡើងវិញបាន ឬគម្រោងការដូរផ្លាស្ទិកជាប្រាក់ អាចកាត់បន្ថយ ៣០% នៃកាកសំណល់ប្លាស្ទិកនៅឆ្នាំ ២០៤០៕