រដ្ឋតំបន់ត្រូពិក Kerala របស់ប្រទេសឥណ្ឌា មានសារមួយជូនប្រជាពលរដ្ឋឲ្យចៀសវាងការទទួលទានផ្លែឈើដែលមានស្នាមក្រញ៉ាំ ឬខាំដោយសត្វប្រចៀវ។ ការព្រមានបែបនេះ ក្នុងគោលបំណងការពារការរីករាលដាលឆ្លងបន្ថែមទៀតវីរុសសម្លាប់មនុស្ស Nipah ដែលកំពុងស្វែងរកផ្លូវថ្មី និងគួរឲ្យព្រួយបារម្ភពីសត្វប្រចៀវ ដើម្បីចម្លងផ្ទាល់ទៅកាន់មនុស្ស។

កាលពីឆ្នាំ២០១៨ វីរុស Nipahបានសម្លាប់សមាជិកគ្រួសារលោក Muthalib ដែលរួមទាំងឪពុករបស់លោក និងបងប្រុស ២នាក់។ បងប្រុស Sabith របស់លោក ត្រូវបានប្រញាប់ប្រញាល់បញ្ជូនទៅកាន់មន្ទីរពេទ្យជាមួយជំងឺគ្រុនក្តៅ ក្អួតចង្អោ ប្រកាច់ ញាក់ និងក្អកខ្លាំង ។

គេចំណាយពេលជិត ២សប្តាហ៍ ក្រោយការស្លាប់របស់គាត់ ដើម្បីឲ្យគ្រូពេទ្យរកឃើញមូលហេតុដែលបណ្តាលឲ្យគាត់ស្លាប់។ ក្រោយមក មនុស្ស ២២នាក់ផ្សេងទៀត បានឆ្លងវីរុស Nipah ហើយមានតែ ២នាក់ប៉ុណ្ណោះ ក្នុងចំណោមពួកគេ បាននៅរស់។

ការស្វែងរកមូលហេតុនៅតំបន់ជិតខាងគ្រួសាររបស់គាត់ នាំឲ្យគេរកឃើញជម្រកសត្វប្រចៀវ និងប្រភេទសត្វប្រចៀវមួយចំនួន ទៀត ធ្វើតេស្តឃើញមានវីរុស Nipah។

លោក Muthalibនិយាយថា ពួកយើងមានដើមត្របែកច្រើនណាស់នៅផ្ទះ ដោយសារតែឪពុករបស់ខ្ញុំ ធ្លាប់ដាំវាច្រើនប្រភេទណាស់។ ដូច្នេះហើយ ពួកយើងមានដើមត្របែកច្រើនប្រភេទ នៅលើដីរបស់ពួកយើង។ ពួកយើងធ្លាប់ទទួលទានផ្លែត្របែកទាំងនេះ ពេលវាជ្រុះដី។ វាគឺជារឿងធម្មតាទេ កាលដែលតំបន់រស់នៅរបស់ពួកយើង មានផ្លែឈើជាច្រើនដូចជាផ្លែស្វាយ និងផ្លែឈើជាច្រើនមុខទៀត។ ពួកយើងមិនហូបស្វាយទេ បើសិនជាវាមានស្នាមខាំ ប៉ុន្តែ ផ្លែត្របែក ពួកយើងហូប ក្រោយចិតយកស្នាមខាំចេញ។

ផ្លែឈើគ្រាន់តែជាទ្រឹស្តីមួយដែលផ្តល់ជូនដោយក្រុមអ្នកវិទ្យាសាស្រ្តថាជាវិធីដែលលោក Sabith បានឆ្លងវីរុស Nipah។

សូមបញ្ជាក់ថា វីរុស Nipah អាចឆ្លងទៅកាន់មនុស្ស ពេលដែលពួកគេប៉ះនឹងវត្ថុរាវដែលមានវីរុស ដូចជា ទឹកមាត់ ទឹកនោម ឈាម និងដំណក់ទឹកក្នុងច្រមុះ ឬដំណក់ទឹកផ្លូវដង្ហើម។ នៅពុំទាន់មានវ៉ាក់សាំងបង្ការវីរុស Nipah នៅឡើយទេ ហើយក៏គ្មានវិធីព្យាបាលវីរុសមួយនេះដែរ ៕