​នាយករដ្ឋមន្ត្រី​កាណាដា លោក Justin Trudeau បាន​និយាយ​នៅ​ថ្ងៃ​ពុធ (១៧​ឧសភា​)​នេះ​ថា ប្រទេស​របស់លោក​បាន​ត្រៀមខ្លួន​ជាស្រេច​ក្នុងការ​ធ្វើជា​ដៃគូ​ជាមួយ​កូរ៉េខាងត្បូង​លើ​គម្រោង​រ៉ែ​សំខាន់ៗ និង​ថាមពល​ស្អាត ព្រមទាំង​ដើម្បី​ការពារ​ការគំរាមកំហែង​ដោយ​នុយក្លេអ៊ែរ និង​មី​ស៊ី​ល​របស់​កូរ៉េខាងជើង​។​

​ថ្លែង​ទៅកាន់​សភា​កូរ៉េខាងត្បូង លោក Trudeau បាន​និយាយថា ប្រទេស​កាណាដា​បាន​ប្តេជ្ញា​បង្កើន​ការចូលរួម​ផ្នែក​យោធា​ដើម្បី​កាត់បន្ថយ​ការ​គម្រាមកំហែង​ដល់​សន្តិសុខ​ក្នុង​តំបន់ ខណៈដែល​កំពុងធ្វើការ​រួមគ្នា​ជាមួយ​ទីក្រុង​សេ​អ៊ូ​ល ដើម្បី​លុបបំបាត់​នុយក្លេអ៊ែរ​កូរ៉េខាងជើង​។​

​លោក​បាន​ជំរុញ​ឱ្យ​ប្រទេស​កូរ៉េខាងជើង​បោះបង់​កម្មវិធី​សព្វាវុធ​របស់ខ្លួន និង​បើក​កិច្ចចរចា​រំសាយ​នុយក្លេអ៊ែរ​ឡើងវិញ ដោយ​បញ្ជាក់ថា​បញ្ហា​ទាំងនេះ​នឹង​ក្លាយជា “​ចំណុច​ស្នូល​" នៃ​កិច្ចប្រជុំ​កំពូល​ជាមួយ​ប្រធានាធិបតី​កូរ៉េខាងត្បូង Yoon Suk Yeol ដែល​គ្រោង​ធ្វើ​នៅ​ល្ងាច​ថ្ងៃ​ពុធ​នេះ ដែល​នឹង​បន្ត​ដោយ​សន្និសីទ​សារព័ត៌មាន និង​ពិសា​អាហារ​ពេល​ល្ងាច​ផ្លូវការ​។​

​លោក Trudeau បាន​ទៅដល់​ទីក្រុង​សេ​អ៊ូ​ល​កាលពី​ថ្ងៃ​អង្គារ (១៦ ឧសភា​) សម្រាប់​ដំណើរ​ទស្សនកិច្ច​លើកដំបូង​ក្នុង​រយៈពេល​ប្រាំបួន​ឆ្នាំ​ដោយ​មេដឹកនាំ​កាណាដា ខណៈដែល​ប្រទេស​ទាំងពីរ​ស្វែងរក​ការជំរុញ​កិច្ចសហប្រតិបត្តិការ​លើ​សន្តិសុខ និង​សារធាតុ​រ៉ែ​សំខាន់ៗ​ដែល​ប្រើប្រាស់​ក្នុង​រថយន្ត​អគ្គិសនី (EVs)៕​