​ប្រធានាធិបតី​បារាំង លោក អេ​ម៉ា​នុយ​អែល ម៉ា​ក្រុង Emmanuel Macron កាលពី​ថ្ងៃ​អង្គារ បាន​ហៅ​ការ​បំពារបំពាន​លើ​រាងកាយ​ចៅប្រុស​របស់​ភរិយា​លោក លោកស្រី Brigitte Macron ជា​រឿង​មិនអាច​ទទួលយកបាន និង​ហួស​ពី​ការ​ថ្លែង​។

«​គាត់​ត្រូវបាន​គេ​បំពាន ដោយសារ​គាត់​ជា​ចៅ​របស់​យើង​»​។ លោក​ម៉ា​ក្រុង បាន​និយាយ​ពី​លោក Jean-Baptiste Trogneux វ័យ ៣០​ឆ្នាំ ដែល​ត្រូវបាន​វាយដំ ដោយ​ក្រុមអ្នកតវ៉ា​ប្រឆាំង​រដ្ឋាភិបាល កាលពី​យប់​ថ្ងៃ​ចន្ទ នៅ​ខាងក្រៅ​ហាង​សូកូឡា ដែល​គាត់​ជា​អ្នកគ្រប់គ្រង នៅ​ភាគ​ខាងជើង​ប្រទេស​បារាំង​។​

​លោក​បាន​និយាយថា លោក​ចាត់ទុក​ទង្វើ​ទាំងនេះ​ថា មិនអាច​ទទួលយកបាន ហើយ​ក្នុងនាម​ជា​ប្រធានាធិបតី​បារាំង ពិតជា​មិនអាច​រក​អ្វី​មក​បរិយាយ ចំពោះ​ពួកគេ​នោះឡើយ ដោយ​បន្ថែម រូបលោក​សង្ឃឹម​នឹង​រកបាន​យុត្តិធម៌ នៅក្នុង​ករណីនេះ​។

​កាលពី​ថ្ងៃ​អង្គារ សាច់ញាតិ​របស់​ស្ត្រី​ទី​១ លោកស្រី Brigitte Macron ត្រូវបាន​វាយដំ នៅ​ខាងក្រៅ​ហាង​សូកូឡា​របស់​គ្រួសារ​នាង ក្នុង​អំពើ​បំពារបំពាន​មួយ​មាន​ហេតុផល​ខាង​នយោបាយ ដែល​បង្ក​ឲ្យ​មានការ​ថ្កោលទោស​យ៉ាង​ទូលំទូលាយ​។​

​ចំណែក​លោក Jean-Baptiste Trogneux ត្រូវបាន​គេ​វាយប្រហារ កាលពី​ល្ងាច​ថ្ងៃ​ចន្ទ នៅពេល​ត្រឡប់​ទៅកាន់​លំនៅឋាន​របស់គាត់ នៅ​ខាងលើ​ហាង​សូកូឡា Trogneux ដ៏​ល្បី​ក្នុង​ទីក្រុង Amiens ភាគ​ខាងជើង​ប្រទេស​បារាំង​៕​