កំពង់ឆ្នាំង៖ ឯកឧត្តម ជ្រុន ថេរ៉ាវ៉ាត រដ្ឋលេខាធិការក្រសួងអភិវឌ្ឍន៍ជនបទ បញ្ជាក់ថា ខេត្តកំពង់ឆ្នាំង បានបញ្ចប់ការបន្ទោបង់ពាសវាលពាសកាលនៅទូទាំងខេត្តហើយ។ ឯកឧត្តមបានបញ្ជាក់បែបនេះ បានធ្វើឡើងក្នុងវេទិការសិក្ខាសាលាឆ្លុះបញ្ចាំងស្តីពីលទ្ធផលផ្ទៀងផ្ទាត់ស្ថានភាពការបន្ទោបង់ពាសវាលពាសកាលក្នុងខេត្តកំពង់ឆ្នាំង នៅព្រឹកថ្ងៃទី១៨ ខែឧសភា ឆ្នាំ២០២៣នេះ។

ឯកឧត្តម ជ្រុន ថេរ៉ាវ៉ាត បានបន្តថា កន្លងមក ឯកឧត្តម បានចាត់បញ្ជូនក្រុមការងារផ្ទៀងផ្ទាត់ODFថ្នាក់ជាតិមកផ្ទៀងផ្ទាត់តាមការស្នើសុំរបស់ខេត្តចាប់ពីថ្ងៃទី១៥-១៧ ខែឧសភា ឆ្នាំ២០២៣។ ជាលទ្ធផលបញ្ជាក់ថា ភូមិឃុំស្រុកទាំងអស់ ពិតជាបានសម្រេចODF ១០០%។

ឯកឧត្តម បានថ្លែងកោតសរសើរដល់អាជ្ញាធរភូមិឃុំស្រុកខេត្ត ជាពិសេសប្រជាពលរដ្ឋ ដែលបានយល់ពីការប៉ះពាល់ដល់សុខភាព ដោយសារការបន្ទោបង់ពាសវាលពាសកាល និងបានរួមគ្នាគិតគូរពីអនាម័យបែបនេះ។ ការបន្ទោបង់ពាសវាលពាសកាល ធ្វើអោយប្រទេសជាតិយើងខាតបង់នូវថវិការយ៉ាងច្រើនជារៀងរាល់ឆ្នាំ ម្លោះហើយយើងត្រូវរួមគ្នា ថែរក្សាអនាម័យ បរិស្ថានស្អាត ការបន្ទោបង់ដាក់ចូលបង្គន់អនាម័យ នោះយើងអាចជៀសវាងបាននូវការឆ្លងជំងឺផ្សេងៗ។

 លោក ជិន រដ្ឋា ប្រធានមន្ទីរអភិវឌ្ឍន៍ជនបទ បានថ្លែងថា៖ ចាប់ពីឆ្នាំ២០២០ រហូតមកដល់បច្ចុប្បន្ន មន្ទីរបានខិតខំប្រឹងប្រែងអនុវត្តកម្មវិធីលើកកម្ពស់អនាម័យជនបទ ដោយបានសហការជាមួយរដ្ឋបាលស្រុកឃុំ តាមស្រុកគោលដៅដែលមិនទាន់សម្រេចODF ដែលមានអង្គការ Plan International, អង្គការ Water Aid Cambodia, អង្គការទស្សនៈពិភពលោក, អង្គការLWD និងអង្គការជាច្រើនទៀតបានចូលរួម។ មន្ទីរបានសម្របសម្រួលដឹកនាំអនុវត្តសកម្មភាពប្រជុំគៀរគរជាមួយរដ្ឋបាលខេត្តស្រុកឃុំ ក្រុមការងារថ្នាក់កណ្តាល សប្បុរសជន អង្គការដៃគូ រៀបចំផែនការសាងសង់បង្គន់អនាម័យជូនគ្រួសារងាយរងគ្រោះគ្មានបង្គន់អនាម័យ សម្របសម្រួលប្រើប្រាស់ថវិកាមូលនិធិឃុំ សម្រាប់សេវាសង្គម ចុះត្រួតពិនិត្យតាមដាន ជម្រុញការសាងសង់បង្គន់អនាម័យតាមខ្នងផ្ទះប្រជាពលរដ្ឋ ធ្វើបច្ចុប្បន្នភាពទិន្នន័យបង្គន់អនាម័យ និងរៀបចំប្រជុំប្រចាំត្រីមាស ដើម្បីឆ្លុះបញ្ជាំងអោយបាននូវលទ្ធផលសម្រេចបាន និងលើកទិសដៅអនុវត្តបន្តអោយអត្រាអនាម័យទូទាំងខេត្តកំពង់ឆ្នាំងសម្រេចបាន១០០%ក្នុងឆ្នាំ២០២៣នេះ៕ ហុង វាស្នា