ភ្នំពេញ៖ ឯកឧត្តមបណ្ឌិត ម៉ឹង មករា ប្រធានសមាគមយុវជនក្រុម៨ និងថ្នាក់ដឹកនាំ ព្រមទាំង​សមាជិក សមាជិកាទាំងអស់ សូមចូលរួមអបអរសាទរ ជូនចំពោះអត្តពលិកកម្ពុជាទាំងអស់ ដែលបានដណ្តើមមេដាយជូនជាតិ យ៉ាងច្រើនសន្ធឹកសន្ធាប់ ​ពីការប្រកួតកីឡាអាស៊ីអាគ្នេយ៍ SEA Games លើកទី៣២ ឆ្នាំ២០២៣ ​ដែលកម្ពុជាធ្វើជាម្ចាស់ផ្ទះ ។

ឯកឧត្តមបណ្ឌិត ម៉ឹង មករា បានលើកឡើងថា ការខិតខំប្រឹងប្រែងរបស់អត្តពលិកកម្ពុជា ក្នុងការដណ្តើមមេដាយជូនជាតិ ក្នុងព្រឹត្តិការណ៍កីឡាអាស៊ីអាគ្នេយ៍ SEA Games លើកទី៣២ ឆ្នាំ២០២៣លើកនេះ បាន​បង្ហាញពិភពលោកទាំងមូលថា ប្រជាជនកម្ពុជា​ពិតជាបានត្រៀម​ខ្លួនរួច​ជាស្រេច និងមាន​សមត្ថភាពគ្រប់គ្រាន់ ​ចូលរួមប្រឡូកក្នុងកិច្ចការជាតិ​ និងអន្តរជាតិ ដោយឈរ​លើស្មារតី "ខ្មែរធ្វើបាន"។ កម្ពុជាបានបង្ហាញឲ្យពិភពលោកទទួលស្គាល់ថា កីឡាមិនត្រឹមតែ​ជាការដណ្តើមយកឈ្នះចាញ់ប៉ុណ្ណោះទេ តែថែមទាំងបាននាំមកនូវចំណងសាមគ្គីភាពជាតិ និងអន្តរជាតិ ​ការកោតសរសើរនិងទទួលស្គាល់ព្រះរាជាណាចក្រកម្ពុជា ជាព្រះរាជាណាចក្រ​អច្ឆរិយៈ និងស្នាមញញឹមដ៏ស្រស់ប្រឹមប្រិយរបស់ជាតិខ្មែរ​សម្រាប់ពិភពលោកទាំងមូល តាម​រយៈការបើក​ចំហរបេះដូងទទួលស្វាគមន៍ រាក់ទាក់ ជាមួយបដិសណ្ឋារកិច្ចដ៏ប្រសើរខ្ពង់ខ្ពស់​របស់ថ្នាក់ដឹកនាំជាតិ ​និងប្រជាជន ជូនចំពោះភ្ញៀវ និងអត្តពលិកអន្តរជាតិ ​យ៉ាងកក់ក្តៅបំផុត។ នេះសបញ្ជាក់ កម្ពុជា "ប្រទេសតូច បេះដូងធំ" និង "កីឡារស់ក្នុងសន្តិភាព" ពិតប្រាកដមែន។

កម្ពុជាអាចរៀបចំព្រឹត្តការណ៍ស៊ីហ្គេមនេះបាន ក៏អាស្រ័យដោយប្រទេសជាតិមានសុខសន្តិភាព ឯកភាពជាតិ ឯកភាពទឹកដី និងមានការអភិវឌ្ឍពេញលេញ ក្រោមការដឹកនាំដ៏ឈ្លាសវៃរបស់ សម្តេចតេជោ នាយករដ្ឋមន្ត្រី។

ឧត្តមភាពដែលមិនអាចកាត់ថ្លៃបានរបស់ សម្តេចតេជោ នាយករដ្ឋមន្ត្រី ក្នុងការតស៊ូលះបង់ ដើម្បី​សង្គ្រោះជាតិនិងប្រជាជន ការកសាងប្រទេសពីបាតដៃទទេរឲ្យមានការអភិវឌ្ឍន៍ដល់សព្វថ្ងៃ និង​ការនាំយកសុខសន្តិភាពពេញលេញ​ តាមរយះនយោបាយ ឈ្នះ-ឈ្នះ បានធ្វើឲ្យប្រជាជន​រស់នៅក្នុងភាពសម្បូរសប្បាយ មាន​ឱកាសគ្រប់គ្រាន់ក្នុងការប្រកបអាជីកម្ម មានសុវត្ថិភាព​ក្នុងការធ្វើដំណើរពេញផ្ទៃប្រទេស ​ប្រទេសជាតិមានការរីកចម្រើនរុងរឿង ​និងជាពិសេស ធ្វើ​ឲ្យពិភពលោកទាំងមូលស្គាល់ច្បាស់ ​និង​កោត​ស្ញប់ស្ញែង​ពី​សមត្ថភាពប្រជាជន​ និងប្រទេសកម្ពុជា តាមរយះការរៀបចំព្រឹត្តការណ៍​ស៊ីហ្គមលើកទី៣២ ​ដែលកម្ពុជាធ្វើជាម្ចាស់ផ្ទះ៕