ភ្នំពេញ៖ ក្រសួងទេសចរណ៍ កំពុងពន្លឿនការសាងសង់អគារសាលាវិជ្ជាជីវៈទេសចរណ៍ ដើម្បីបើកឲ្យសិស្ស និស្សិតបានសិក្សា នៅឆ្នាំ២០២៤ ដែលសាលានេះ នឹងចូលរួម ពង្រឹងជំនាញលើវិស័យទេសចរណ៍ ឲ្យកាន់តែល្អប្រសើរថែមទៀត ។

ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានឱ្យដឹងថា សាលាបណ្ដុះបណ្ដាលលើវិស័យ ទេសចរណ៍នេះ នៅកម្ពុជា ធ្លាប់មានដែរ ប៉ុន្តែក្នុងកម្រិតតូចៗ ហើយនៅពេលកម្ពុជា សាងសង់​សាលានេះ រួចរាល់ ​នឹងជួយពង្រឹងជំនាញសេវាទេសចរណ៍ផ្សេងៗដល់ប្រជាពលរដ្ឋ ដែលប្រកប​អាជីវកម្មលើវិស័យនេះ ។

ឯកឧត្តម បានបញ្ជាក់ថា បន្ទាប់ពីបើកឲ្យសិក្សា គឺចាប់ផ្ដើមទទួលសិស្សពីកម្រិតសិក្សាចប់ថ្នាក់ទី៩ នេះវាជាឱកាសសម្រាប់ពលរដ្ឋ ដែលពុំមានលទ្ធភាពឲ្យកូនៗសិក្សាបន្តដល់ចប់ថ្នាក់ទី១២ អាចជំរុញពួកគេឲ្យរៀនជំនាញទេសចរណ៍ក្នុងសាលានេះ​ ដោយពេលបញ្ចប់ទៅ នឹងអាចមាន​ជំនាញ​ធ្វើការងារ ខណៈកម្ពុជានៅមានការខ្វះខាតច្រើនលើអ្នកមានជំនាញផ្នែកទេសចរណ៍នេះ ។

ឯកឧត្តម ឆាយ ឃុនឡុង នាយកសាលាវិជ្ជាជីវៈទេសចរណ៍ បានលើកឡើងថា បច្ចុប្បន្នក្រសួង ទេសចរណ៍កំពុងសាងសង់សាលាវិជ្ជាជីវៈទេសចរណ៍ ​ចំនួន២ ​គឺនៅរាជធានីភ្នំពេញ សម្រេច​បានជាង ២៥ភាគរយ និងខេត្តព្រះសីហនុ ​សម្រេចជាង១៦ភាគរយ ។

ឯកឧត្តម បានបន្តថា តាមការគ្រោងទុក​ អគារសាលានេះ​ នឹងបញ្ចប់ការសាងសង់នៅខែមេសា ឆ្នាំ២០២៤ ​ហើយជ្រើសរើសឲ្យសិស្សចូលសិក្សានៅឆមាសទី២ ឆ្នាំ២០២៤ ដែលតាមការសិក្សា​របស់អ្នក ជំនាញ Mascon Tour នៅឆ្នាំទី១ សាលាគ្រោងបើកថ្នាក់វិញ្ញាបនបត្រជំនាញវិជ្ជាជីវៈ និងជ្រើសរើសយុវជន សិស្ស ដែលបានបញ្ចប់ការសិក្សាថ្នាក់ទី៩ឡើង ​ប្រមាណ៣០០នាក់ នៅភ្នំពេញ ​និងនៅខេត្តព្រះ សីហនុ ២០០នាក់ ​ដោយមានគ្រូបង្រៀនជាតិ និងអន្តរជាតិ ។

គួរបញ្ជាក់ថា មុខជំនាញ ដែលសិស្ស និស្សិត អាចជ្រើសរើសសិក្សាបាន ​មានចំនួន៤ផ្នែក សំខាន់ៗ ទី១. ផ្នែកសេវាកម្មសណ្ឋាគារ និងសេវាកម្មទេសចរណ៍, ទី២. ផ្នែកសេវាកម្មម្ហូបអាហារ និង ភេសជ្ជៈ, ទី៣. ផ្នែកសេវាកម្មធ្វើដំណើរ និងទី៤. ផ្នែកសេវាទេសចរណ៍ និងផ្ដល់កម្រិតគុណវុឌ្ឍវិជ្ជាជីវៈ ចាប់ពីវិញ្ញាបនបត្រកម្រិត១ ​ទៅកម្រិត៣ រៀនរយៈពេល១ឆ្នាំ ​និងឌីប្លូមកម្រិតខ្ពស់ រៀនរយៈពេល​២ឆ្នាំ និងមានវគ្គបណ្ដុះបណ្ដាលបន្ត និងខ្លី និងជាមជ្ឈមណ្ឌលវាយតម្លៃស្របតាមស្ដង់ដាជាតិ និងអន្តរជាតិ ៕អត្ថបទ៖ បាន សុខរិទ្ធិ