ភ្នំពេញ៖ តាមតួលេខក្រុមការងារបដិសណ្ឋារកិច្ចប្រចាំអាកាសយានដ្ឋានអន្តរជាតិភ្នំពេញ បានឲ្យដឹងថា គិតចាប់ពីថ្ងៃទី៧ រហូតដល់ថ្ងៃទី១៨ ខែឧសភានេះ មានប្រតិភូកីឡា និងអត្តពលិកបណ្តាប្រទេសអាស៊ាន ប្រមាណជាង៥០% នៃចំនួនប្រតិភូ និងអត្តពលិកអាស៊ានសរុប បានធ្វើដំណើរចាកចេញពីកម្ពុជា ត្រឡប់ទៅប្រទេសខ្លួនវិញ ក្រោយពីព្រឹត្តិការណ៍​ប្រកួតកីឡាស៊ីហ្គេម​លើកទី៣២ ​បានបិទបញ្ចប់នៅយប់មិញនេះ។

ឧត្តមសេនីយ ដោក សុផាត អនុប្រធានក្រុមការងារបដិសណ្ឋារកិច្ច ប្រចាំអាកាសយានដ្ឋាន​អន្តរជាតិភ្នំពេញ ​បានថ្លែងប្រាប់BTV ថ្ងៃទី១៨ ខែឧសភានេះ បានថ្លែងថា ​តាមតួលេខប្រតិភូ និង​អត្តពលិកអាស៊ាន ដែលត្រូវចាកចេញពីកម្ពុជានៅក្នុងថ្ងៃផ្ទាល់​ គឺមានប្រមាណជិត ៦០០នាក់ ហើយនៅសល់ភ្ញៀវកីឡាអាស៊ានជាច្រើនទៀត​ កំពុងបន្តស្នាក់នៅកម្ពុជា ។

សម្រាប់ប្រតិភូ និងក្រុមអត្តពលិកប្រទេសអាស៊ាន ដែលបានត្រឡប់ទៅប្រទេសខ្លួនវិញ នៅ​ព្រឹកថ្ងៃនេះដែរ បាននាំគ្នាថ្លែងការអរគុណកម្ពុជា ហើយកម្ពុជាបានបង្កើតព្រឹតិ្តការណ៍​ដ៏អស្ចារ្យបំផុត​ក្នុងប្រវត្តិសាស្ត្រស៊ីហ្គេមមិនធ្លាប់មាន ធ្វើឲ្យពួកគាត់សាងអនុស្សាវរីយ៍មិនអាចបំភ្លេច​បានជាច្រើនជា​មួយពលរដ្ឋកម្ពុជា ​ជាពិសេសនោះ តាមរយៈព្រឹត្តិការណ៍នេះគឺបានធ្វើឲ្យប្រជាជាតិបណ្តា​ប្រទេស​អាស៊ាន មានរួបរួមគ្នា បង្កើនការសាមគ្គីភាព ​មិត្តភាព កិច្ចសហប្រតិបត្តិការដ៏ល្អប្រសើរនៅក្នុង​តំបន់​អាស៊ីអាគ្នេយ៍។

សូមបញ្ជាក់ថា អំឡុងពេលកម្ពុជារៀបចំព្រឹតិ្តការណ៍ ស៊ីហ្គេមលើកទី៣២ គឺមានប្រតិភូកីឡា និងអត្តពលិកអាស៊ានប្រមាណជិត ១១ ០០០ នាក់បានធ្វើដំណើរមកកម្ពុជា ៕អត្ថបទ ស៊ុម សុខជា