ភ្នំពេញ៖ គិតត្រឹមថ្ងៃទី១៨ ខែឧសភានេះ គណៈកម្មាធិការជាតិរៀបចំការបោះឆ្នោត ដែលហៅកាត់ថា គ.ជ.ប បានទទួលស្គាល់ជាផ្លូវការចុះបញ្ជីឈ្មោះគណបក្សនយោបាយចំន១៨ សម្រាប់ការបោះឆ្នោតជ្រើសតាំងតំណាងរាស្រ្ត នីតិកាលទី៧ ឆ្នាំ២០២៣។ នេះបើតាមប្រសាសន៍របស់ឯកឧត្តម ហង្ស ពុទ្ធា អ្នកនាំពាក្យ គ.ជ.ប ផ្តល់បទសម្ភាសន៍ ជាមួយBTV នៅថ្ងៃនេះ។

នៅក្នុងកិច្ចសម្ភាសនោះ ឯកឧត្តមហង្ស ពុទ្ធា បន្តថា តាមប្រតិទិនរបស់ គ.ជ.ប ការចុះឈ្មោះបញ្ជី​គណបក្សនយោបាយឈរឈ្មោះ ​និងបញ្ជីបេក្ខជនឈរឈ្មោះ ​សម្រាប់ការបោះឆ្នោត​ជ្រើសតាំង​តំណាងរាស្រ្ត នីតិកាលទី៧ ឆ្នាំ២០២៣ គឺចាប់ផ្តើមពីថ្ងៃទី២៤ខែមេសា ​ដល់ថ្ងៃទី៨ ខែឧសភា ឆ្នាំ២០២៣ ​ដោយមានគណបក្សចំនួន២០មកចុះឈ្មោះជាមួយ គ.ជ.ប ប៉ុន្តែមានគណបក្សចំនួន១៨ ប៉ុណ្ណោះដែល គ.ជ.ប បានទទួលស្គាល់ជាផ្លូវការ ខណៈនៅសល់គណបក្សពីរទៀតមិនទាន់​បំពេញ​គ្រប់លក្ខខ័ណ្ឌ។ លើសពីនេះ ឯកឧត្តម ​បានលើកឡើងពីនិតិវិធីរបស់ គ.ជ.ប ក្នុងដំណើរការ​ចុះឈ្មោះបញ្ជីគណបក្សនយោបាយឈរឈ្មោះ ​និងបញ្ជីបេក្ខជនឈរឈ្មោះផងដែរ។

គណបក្សនយោបាយ ដែល គ.ជ.ប ទទួលស្គាល់ជាផ្លូវការចំនួន១៨ ដោយគិតត្រឹម​ថ្ងៃទី១៨ ខែឧសភានេះ រួមមាន៖ ទី១.គណបក្សប្រជាជនកម្ពុជា ទី២.គណបក្សយុវជនកម្ពុជា ទី៣.គណបក្សខ្មែររួបរួមជាតិ ទី៤.គណបក្សធម្មាធិបតេយ្យ ទី៥.គណបក្សកម្លាំងប្រជាធិបតេយ្យ ទី៦.គណបក្សសញ្ជាតិកម្ពុជា ទី៧.គណបក្សខ្មែរតែមួយ ទី៨.គណបក្សខ្មែរអភិរក្ស ទី៩.គណបក្សហ៊្វុនស៊ិនប៉ិច ទី១០.គណបក្សសំបុកឃ្មុំប្រជាធិបតេយ្យ ទី១១.គណបក្សឯកភាពជាតិខ្មែរ ទី១២.គណបក្សបំណងពលរដ្ឋ ទី១៣.គណបក្សស្រ្តីដើម្បីស្រ្តី ទី១៤.គណបក្សខ្មែរឈប់ក្រ ទី១៥.គណបក្សខ្មែរអភិវឌ្ឍន៍សេដ្ឋកិច្ច ទី១៦.គណបក្សជនជាតិដើមប្រជាធិបេត្យកម្ពុជា ទី១៧.គណបក្សប្រជាធិបតេយ្យមូលដ្ឋាន និងទី១៨.គណបក្សកសិករ៕ អត្ថបទ៖ទូច សោភ័ណ