ប្រធានាធិបតីអេក្វាឌ័រ លោក Guillermo Lasso ដែលកំពុងប្រឈមមុខនឹងការបោះឆ្នោតចោទប្រកាន់ទម្លាក់តំណែងជិតមកដល់នោះ បានប្រើប្រាស់មាត្រាច្បាប់រដ្ឋធម្មនុញ្ញមួយ ដើម្បីរំលាយរដ្ឋាភិបាល ជាការសម្រេចពោរពេញដោយការបារម្ភខាងនយោបាយ ដែលអាចបង្កឲ្យមានការតវ៉ាចំពោះប្រទេស ដែលកំពុងដោះស្រាយនឹងស្ថានការណ៍សន្តិសុខដ៏ផុយស្រួយរួចហើយនោះ។

យោងតាមក្រឹត្យដែលបានចេញផ្សាយនៅលើគេហទំព័ររបស់លោកប្រធានាធិបតី បានឲ្យដឹងថា មេដឹកនាំអេក្វាឌ័របានអំពាវនាវឲ្យប្រើនូវនីតិវិធី ឈ្មោះថា «មរណៈទាំងសងខាង» ដែលសភាជាតិដឹកនាំដោយគណបក្សប្រឆាំង ត្រូវបានរំលាយ ហើយស្នើឲ្យមានការបោះឆ្នោតមុនអាណត្តិ។

យោងតាមប្រធានក្រុមប្រឹក្សាបោះឆ្នោតរបស់ប្រទេសអេក្វាឌ័រ លោកស្រី Diana Atamaint ការសម្រេចរបស់លោកប្រធានាធិបតី ក្នុងការដាក់រដ្ឋក្នុងឈើឆ្កាងមរណៈ (Cross Death) ដែលមានន័យថា លោក Lasso អាចគ្រប់គ្រងដោយក្រឹត្យរហូតដល់ការបោះឆ្នោតត្រូវបានធ្វើឡើង ដើម្បីជ្រើសរើសប្រធានាធិបតី និងស្ថាប័ននីតិប្បញ្ញត្តិថ្មី។ ការបោះឆ្នោតនឹងប្រព្រឹត្តទៅក្នុងរយៈពេល ៩០ថ្ងៃខាងមុខ។

ការអំពាវនាវឲ្យលោក Lasso លាលែងពីតំណែង បានកើនឡើងកាន់តែខ្លាំងក្នុងរយៈពេលប៉ុន្មានខែថ្មីៗនេះ ដោយសារប្រទេសនេះត្រូវបានញាំញីទៅដោយវិបត្តិតម្លៃនៃការរស់នៅ និងអត្រាខ្ពស់នៃហិង្សាឧក្រិដ្ឋកម្ម។ ប៉ុន្តែការប្រកាសនីតិវីធី «មរណៈទាំងសងខាង» បានបញ្ឈប់ដំណើរការចោទប្រកាន់លើលោក Lasso នៅក្នុងរដ្ឋសភា ដែលបានចាប់ផ្តើមកាលពីម្សិលមិញ។

លោក Lasso បានប្រាប់ប្រជាជាតិរបស់លោក នៅក្នុងសុន្ទរកថាមួយ កាលពីថ្ងៃពុធថា៖ «នេះគឺជាពេលវេលាថ្មី ដើម្បីមាននូវសុទិដ្ឋិនិយម។ ចូរយើងកសាងអនាគតដ៏ល្អប្រសើរសម្រាប់អេក្វាឌ័រ។ នេះគឺជាការសម្រេចចិត្តបែបប្រជាធិបតេយ្យ មិនមែនត្រឹមតែដោយសារតែរដ្ឋធម្មនុញ្ញប៉ុណ្ណោះទេ ប៉ុន្តែថែមទាំងអនុញ្ញាតឲ្យអ្នកសម្រេចចិត្តលើអនាគតរបស់អ្នកផងដែរ»៕