ក្រុមអាជ្ញាធរ និយាយថា រថយន្តធុនធំជាច្រើនគ្រឿង បានរងការដុតបំផ្លាញកាលពីព្រឹកថ្ងៃពុធ អំឡុងការវាយប្រហារមួយនៅតំបន់ជ្រួលច្របល់ Araucania ដែលជាតំបន់ញាំញីជាយូរមកហើយដោយសារជម្លោះរវាងក្រុមជនជាតិដើមភាគតិច Mapuche និងរដ្ឋាភិបាលឈីលី។  

យោងតាមការអះអាងរបស់ក្រុមនគរបាលឈីលី បានឲ្យដឹងថា រថយន្ត ២គ្រឿង និងគ្រឿងចក្រមួយគ្រឿង រងការដុតបំផ្លាញដោយក្រុមប្រដាប់អាវុធពាក់ម៉ាស់ ។  

យោងតាមសារព័ត៌មានក្នុងស្រុក បានឲ្យដឹងដែរថា ក្រុមប្រដាប់អាវុធពាក់ម៉ាស់ បានបន្សល់ទុកសារមួយសន្លឹកទាមទារឲ្យដោះលែងអ្នកទោសនយោបាជនជាតិដើមភាគតិច Mapuche ។ គ្មាននរណាម្នាក់ បានរងរបួសនោះឡើយនៅក្នុងការវាយប្រហារលើកនេះ។  

ដោយឡែក ការវាយប្រហារមួយផ្សេងទៀត កាលពីថ្ងៃអង្គារ នៅទីក្រុង Victoria ស្ថិតក្នុងតំបន់ Araucania បានមើលឃើញកសិករម្នាក់ រងរបួសដោយសារត្រូវគ្រាប់កាំភ្លើង ក្រោយរថយន្តរបស់គាត់ រងការវាយប្រហារ  

 គួរឲ្យដឹងថា តំបន់ Araucania ខេត្ត Biobio និងខេត្ត Arauco នៃតំបន់ Biobio ស្ថិតក្រោមការដាក់រដ្ឋក្នុងគ្រាអាសន្នអស់រយៈពេល ១ឆ្នាំមកហើយ ។  

វិធានការមួយនេះ បានបន្ត ២៣លើក និងអនុញ្ញាតឲ្យកងកម្លាំងប្រដាប់អាវធដាក់ពង្រាយដើម្បីគាំទ្រប្រតិបត្តិការរបស់ក្រុមនគរបាល ។  

ជនជាតិដើមភាគតិច Mapuche ប្រហែល ១,៧លាននាក់ រស់នៅក្នុងប្រទេសឈីលី ហើយភាគច្រើននៃពួកគេនៅក្នុងតំបន់ Araucania គឺជាតំបន់ព្រៃក្រាស់គ្របដណ្តប់ដោយភ្នំភ្លើងមានចម្ងាយជាង ៦៤០គ.មភាគខាងត្បូងនៃរដ្ឋធានី Santiago របស់ប្រទេសឈីលី ៕