ព្យុះធូលី បានគ្រប់ដណ្តប់ពីលើរដ្ឋធានីញូវ ដែល្លី ប្រទេសឥណ្ឌា និងបណ្តាលឲ្យគុណភាពខ្យល់នៅក្នុងរដ្ឋធានីមួយនេះ ធ្លាក់ដល់កម្រិតគ្រោះថ្នាក់ ដែលជាប្រភេទគុណភាពខ្យល់អន់ កាលពីថ្ងៃពុធ ។  

សារព័ត៌មានក្នុងស្រុក រាយការណ៍ថា រដ្ឋធានីញូវ ដែល្លី បានជួបប្រទះព្យុះធូលី កាលពីថ្ងៃអង្គារ ដែលបានកាត់បន្ថយកម្រិតមើលឃើញមកនៅត្រឹម ១.១០០ម៉ែត្រ និងបង្កើនកម្រិតភាគល្អិត ធ្វើឲ្យគុណភាពខ្យល់ធ្លាក់ដល់កម្រិតគ្រោះថ្នាក់ ។  

ទិន្នន័យពីប្រព័ន្ធគុណភាពខ្យល់ ស្រាវជ្រាវ និងព្យាករណ៍ឧតុនិយម(SAFAR) បង្ហាញថា ការវាស់គុណភាពខ្យល់ទាំងអស់នៅក្នុងរដ្ឋធានី មានកម្រិត ២៦៧ ។  

ស្រទាបដ៏ក្រាស់នៃព្យុះធូលី បាននៅពីលើទីក្រុងញូវ ដែល្លី កាលពីព្រឹកថ្ងៃពុធ ពេលដែលវិមាន ផ្លូវ និងអគារខ្ពស់ៗ ត្រូវបានគេមើលឃើញគ្របដណ្តប់ដោយសំណុំផ្សែងធូលី ។  

លោក Vimlendu Jha គឺជាអ្នកបរិស្ថាន និងជាប្រធានប្រតិបត្តិទីភ្នាក់ងារ Green The Map និយាយថា ជាការពិតណាស់ថាមានព្រឹត្តការណ៍ខុសពីធម្មតា ពុំមានភ្លៀងធ្លាក់ មានកម្តៅ និងមានខ្យល់បក់ខ្លាំង ដែលស្ថានភាពបែបនេះ នាំឲ្យកើតមានព្យុះធូលី ធ្វើឲ្យកើតមានខ្យល់កង្វក់ខ្លាំង ហើយវាពិតជាគ្រោះថ្នាក់ខ្លាំងណាស់ ។  

ក្រុមអ្នកបរិស្ថាន មានជំនឿថា ស្ថានភាពបែបនេះ នឹងមានរយៈពេលពីរបីថ្ងៃទៀត រហូតដល់មានភ្លៀងធ្លាក់ ។ 

សូមបញ្ជាក់ថា ក្រុមអាជ្ញាធរ បានចាត់វិធានការជាច្រើនក្នុងរយៈពេលប៉ុន្មានឆ្នាំកន្លងមកនេះ ដើម្បីធ្វើឲ្យល្អប្រសើរគុណភាពខ្យល់នៅក្នុងទីក្រុង ក្នុងនោះរួមទាំងការផ្លាស់ប្តូរសេវាកម្មដឹកជញ្ជូននៅក្នុងរដ្ឋធានីញូវ ដែល្លី មកប្រើប្រាស់ឥន្ធនៈស្អាត បាញ់ទឹកសម្អាតពីលើកំពូលប៉មអគារ និងតាមផ្លូវ ហើយនិងគ្រប់គ្រងការដុតបំផ្លាញព្រៃឈើ និងកាកសំណល់ អំឡុងរដូវត្រជាក់ ៕