អ្នកនាំពាក្យរបស់ព្រះអង្គម្ចាស់ បាននិយាយកាលពីថ្ងៃពុធថា ព្រះអង្គម្ចាស់ Harryរបស់ចក្រភពអង់គ្លេស និងអ្នកម្នាង Meghan និងមាតារបស់ព្រះនាង បានស្ថិតក្នុងការដេញតាមដោយរថយន្តស្ទើរតែមានគ្រោះថ្នាក់ដែលជាប់ពាក់ព័ន្ធទៅនឹងអ្នកប្រមាញ់រូបភាព បន្ទាប់ពីពួកគេបានចូលរួមក្នុងពិធីប្រគល់រង្វាន់នៅក្នុងទីក្រុងញ៉ូវយ៉ក។

យោងតាមអ្នកនាំពាក្យ បានឲ្យដឹងថា ឧបត្តិហេតុនេះ ជាប់ពាក់ព័ន្ធនឹងរថយន្តកញ្ចក់ខ្មៅ ៦គ្រឿង ដែលបើកបរក្នុងស្ថានភាពដ៏គ្រោះថ្នាក់ និងធ្វើឲ្យព្រះអង្គម្ចាស់និងអ្នកម្នាង រួមទាំងម្តាយរបស់អ្នកម្នាងMeghan លោកស្រី Doria Ragland ស្ថិតក្នុងគ្រោះថ្នាក់។

ការដេញតាមឥតឈប់ ដែលមានរយៈពេលជាង២ម៉ោង ស្ទើរតែមានការប៉ះទង្គិចគ្នាច្រើនលើក ដែលជាប់ពាក់ព័ន្ធនឹងអ្នកបើកបរផ្សេងទៀតនៅលើដងផ្លូវ អ្នកដំណើរថ្មើរជើងនិងមន្ត្រីនគរបាលក្រុងញ៉ូវយ៉ងពីរ  រូប។ ព្រះអង្គម្ចាស់និងអ្នកម្នាង មានការភិតភ័យដោយឧបត្តិហេតុនេះ ប៉ុន្តែពុំមានគ្រោះថ្នាក់អ្វីនោះទេ។ 

ព្រះអង្គម្ចាស់ បានមានបន្ទូលដោយឥតសំចៃជាយូរមកហើយអំពីកំហឹងរបស់ទ្រង់ពាក់ព័ន្ធនឹងការរំខានរបស់ក្រុមសារព័ត៌មាន ដែលព្រះអង្គបានស្តីបន្ទោសចំពោះការយាងព្រះពិរាល័យរបស់ព្រះមាតា ម្ចាស់ក្សត្រីDiana ដែលបានយាងព្រះពិរាល័យ នៅពេលរថយន្តរបស់ទ្រង់ បានជួបគ្រោះថ្នាក់ ខណៈរថយន្តបើកបរក្នុងល្បឿនដ៏លឿនដើម្បីដេញតាមប្រមាញ់រូបភាពក្នុងទីក្រុងប៉ារីស ក្នុងឆ្នាំ១៩៩៧។