ក្រសួងការបរទេសអ៊ុយក្រែននិយាយថា អំឡុងជំនួបនៅក្នុងទីក្រុងគីវ កាលពីថ្ងៃពុធ រដ្ឋមន្ត្រីការបរទេសអ៊ុយក្រែនលោក Dmytro Kuleba និយាយប្រាប់ប្រេសិតពិសេសចិនលោក Li Hui ថា ប្រទេសរបស់លោកនឹងមិនអាចទទួលយកបានឡើយរាល់សំណើណាមួយចង់បញ្ចប់សង្គ្រាមពាក់ព័ន្ធនឹងការបាត់បាត់បង់ដី ឬបញ្ចប់ជម្លោះដោយគ្មានសន្ធិសញ្ញាសន្តិភាពនោះ ។
ក្រសួងការបរទេសអ៊ុយក្រែន និយាយនៅក្នុងសេចក្តីថ្លែងការណ៍ថា លោក Li ដែលជាអ្នកតំណាងពិសេសចិនទទួលបន្ទុកកិច្ចចារអឺរ៉ុប-អាស៊ី និងជាអតីតឯកអគ្គរដ្ឋទូតប្រចាំនៅរុស្ស៊ី បានបំពេញទស្សនកិច្ចរយៈពេល ២ថ្ងៃនៅប្រទេសអ៊ុយក្រែនកាលពីថ្ងៃអង្គារ និងថ្ងៃពុធ ហើយនិងបានជួបលោក Dmytro ។
ដំណើរទស្សនកិច្ចនេះ គឺជាដំណើរលើកដំបូងទៅកាន់ទីក្រុងគីវដោយមន្ត្រីជាន់ខ្ពស់មកពីប្រទេសចិន ដែលមានទំនាក់ទំនងរីកចម្រើនជាមួយរុស្ស៊ី ចាប់តាំងពីការវាយលុកទ្រង់ទ្រាយធំរបស់ទីក្រុងម៉ូស្គូលើអ៊ុយក្រែន កាលពីខែកុម្ភៈ ឆ្នាំ ២០២២ ។
ក្រសួងការបរទេសអ៊ុយក្រែន និយាយថា លោក Kulebaបានរៀបរាប់ប្រាប់ប្រេសិតពិសេសចិនពីរឿងរ៉ាវលម្អិតលើគោលការណ៍ស្តារសន្តិភាពប្រកបដោយចីរភាព និងយុត្តិធម៌ ដោយផ្អែកលើការគោរពអធិបតេយ្យភាព និងបូរណភាពទឹកដីរបស់អ៊ុយក្រែន
លោក Kuleba បានធ្វើការសង្កត់ធ្ងន់ថា អ៊ុយក្រែន មិនអាចទទួលយកបានឡើយរាល់សំណើពាក់ព័ន្ធនឹងការកាត់ទឹកដីឲ្យរុស្ស៊ី ឬបញ្ចប់ជម្លោះដោយគ្មានសន្ធិសញ្ញាសន្តិភាពនោះ ។
គេរំពឹងផងដែរថា ដំណើរទស្សនកិច្ចរបស់មន្ត្រីជាន់ខ្ពស់ចិន ទៅកាន់អឺរ៉ុប នឹងរួមបញ្ជូលកិច្ចពិភាក្សានៅប្រទេសរុស្ស៊ី ប៉ូឡូញ បារាំង និងអាល្លឺម៉ង់ផងដែរ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
