ភ្នំពេញ៖ ផ្លូវបេតុងថ្មីមួយខ្សែ ស្ថិតក្នុងសង្កាត់ស្ទឹងមានជ័យទី១ ខណ្ឌមានជ័យ ត្រូវបានធ្វើពិធីបើកការដ្ឋានស្ថាបនាជាផ្លូវការណ៍ នារសៀលថ្ងៃទី១៨ ខែឧសភា ឆ្នាំ២០២៣នេះ ក្រោមវត្តមានលោក ឌី សុខែម អភិបាលរងខណ្ឌមានជ័យ តំណាងលោក ហែម ដារិទ្ធិ អភិបាលខណ្ឌ និងមានការអញ្ជើញ​ចូលរួមពីលោកស្រីអភិបាលរង លោកចៅសង្កាត់ ផងដែរ ។

លោក ជា សារ៉េត ចៅសង្កាត់ស្ទឹងមានជ័យទី១ បានអោយដឹងថា ផ្លូវបេតុងដែលកំពុង​ធ្វើការ​ស្ថាបនានេះ ជាបេតុងគ្មានសសៃដែក ដែលមានប្រវែងសរុប ១០៣៣ម៉ែត្រ មានទទឹង០៥ម៉ែត្រ និងមានកម្រាស់ ០,១៥ម៉ែត្រ ដែលផ្លូវនេះបានរៀបចំប្រព័ន្ធលូបង្ហូរទឹករួចជាស្រេចហើយ មានមុខកាត់១ម៉ែត្រផងដែរ ។ លោកចៅសង្កាត់បន្តថា ផ្លូវបេតុងកំពុងស្ថាបនានៅពេលនេះ មានពលរដ្ឋចំនួន០៣ភូមិរស់នៅជាប់នឹងផ្លូវ គឺភូមិថ្មី ភូមិមានជ័យ និងភូមិមានជ័យ២ ។

លោក ឌី សុខែម អភិបាលរងខណ្ឌមានជ័យ បានលើកឡើងថា ផ្លូវបេតុងមួយខ្សែនេះ បានផ្តល់​អត្ថប្រយោជន៍​យ៉ាងសំខាន់សម្រាប់ពលរដ្ឋទូទៅទាំងក្នុងតំបន់ និងក្រៅតំបន់អាចប្រើប្រាស់​បាន​ជាប្រយោជន៍រួមទាំងអស់គ្នា ។

លោកអភិបាលរង បន្ថែមថា ​ដោយពិនិត្យឃើញថា ​កាលពីពេលមុនផ្លូវមួយខ្សែនេះ ទទួលរងការ​ខូចខាតច្រើន ដោយមានជាចង្ហុកធំៗ ​ហើយរៀងរាល់ខែភ្លៀងក៏មានទឹកលិចផងដែរ ទើប​អាជ្ញាធរមូលដ្ឋានសង្កាត់ខណ្ឌ ​តាមរយៈគម្រោងមូលនិធិសង្កាត់ ​បានគិតគូរដាក់ប្រព័ន្ធលូបង្ហូរទឹក និងបើកការស្ថាបនាផ្លូវថ្មីជូនពលរដ្ឋសម្រាប់ប្រើប្រាស់តែម្តង ។

ប្រជាពលរដ្ឋដែលរស់នៅតាមបណ្តោយផ្លូវបេតុងថ្មីដែលកំពុងដំណើរការស្ថាបនាខាងលើនេះ បាន​បង្ហាញក្តីរំភើប​ និងអារម្មណ៍​សប្បាយរីករាយ ​ជាមួយនឹង​សមិទ្ធផលថ្មីនេះសម្រាប់តំបន់រស់នៅ​របស់​ពួកគាត់ទាំងអស់គ្នា ​ខណៈពីពេលមុន ពួកគាត់ថា ផ្លូវនេះ ​មានសភាព​ទ្រុឌទ្រោម និង​មានទឹកលិចទៀតផងដែរ ។

ពលរដ្ឋ បង្ហាញថា នៅពេលមានផ្លូវបេតុងថ្មីហើយនោះ ​ពួកគាត់អាចជិះម៉ូតូ ឬរថយន្តធ្វើដំណើរ​ឆ្លងកាត់​បានយ៉ាងងាយស្រួល ​ពិសេសនោះពួកគាត់ក៏អាចប្រើប្រាស់​ផ្លូវសម្រាប់ការ​ដើរ​ធ្វើលំហាត់ប្រាណបាន ​នៅរៀងរាល់ព្រឹក ឬក៏វេលាល្ងាចឡើងជាដើម ៕