​ឧ​ត្ត​ម​សេនីយ៍​យោធា​ជាន់ខ្ពស់​ហ្វីលីពីន លោក Andres Centino កាលពី​ថ្ងៃ​ពុធ (​ទី​១៧ ឧសភា​) បាន​ចុះទៅ​សួរសុខទុក្ខ​ក្រុម​ទាហានជើងទឹក​មួយក្រុម​តូច ដែល​ត្រូវបាន​ដាក់ពង្រាយ​នៅ​កោះដាច់​ស្រយាល​មួយ ក្នុង​ខេត្ត Palawan ក្បែរ​ប្រជុំ​កោះ​ស្ព្រា​ត​លី (Spratly) ដែលមាន​ជម្លោះ ក្នុង​សមុទ្រ​ចិន​ខាងត្បូង ខណៈ​លោក​និយាយ​បញ្ជាក់​ពី​សារៈសំខាន់ សម្រាប់​សកម្មភាព​តាមដានរ​បស់ទីតាំង​ក្នុង​តំបន់​។​

​លោក Centino បាន​ប្រាប់​អ្នកសារព័ត៌មាន​ថា​៖ «​ក្រុម​នៃ​កោះ​នេះ គឺជា​កន្លែង ដែល​នាវា​នានា​មកពី​ខាងក្រៅ​ដែនទឹក​អន្តរជាតិ​ឆ្លងកាត់ ដើម្បី​ចូល​ចត​។ នេះ​ក៏​ជា​កន្លែង​ដែល​ពួកគេ​ឆ្លងកាត់ ដើម្បី​ទៅកាន់​ផ្នែក​ម្ខាង​នៃ​មហាសមុទ្រ​ប៉ាស៊ីហ្វិក​។ វា​ជា​រឿង​សំខាន់​ណាស់ ដែល​យើង​អាច​តាមដាន និង​អង្កេត​មើលថា អ្នកណា​ចូល និង​ចេញ​»​។

​ដំណើរ​ទស្សនកិច្ច​រប​ស់លោក Centino នៅ​ស្ថានីយ៍​កងទ័ពជើងទឹក Narciso del Rosario ដែលជា​ទីតាំង​នៃ​ផ្លូវ​ឆ្នេរ​ថ្មី និង​កន្លែង​ឈរជើង​នេះ គឺជា​កន្លែង​ឈប់​សំចត​ទី​ពីរ​របស់លោក នៅលើ​ក្រុម​កោះ Balabac ដែល​នៅ​ទីនោះ លោក​ក៏បាន​ត្រួតពិនិត្យ​មូលដ្ឋាន​ទ័ពអាកាស​ហ្វីលីពីន​ទំហំ ៣០០​ហិកតា​ផងដែរ​។

​ទីក្រុង​ម៉ានីល បានចាប់ផ្តើម​សាងសង់​ផ្លូវ​យន្តហោះ​ចុះ​ប្រវែង ៣​គីឡូម៉ែត្រ នៅ​មូលដ្ឋាន​ទ័ពអាកាស ដែល​នឹង​រៀបចំ​ផងដែរ​នូវ​ជំនួយ​មនុស្សធម៌ និង​កន្លែង​សង្គ្រោះ​គ្រោះមហន្តរាយ ហើយ​និង​ជា​បន្ទាយ​ដែល​ជនជាតិ​អាមេរិក អាច​ប្រើប្រាស់​បាន​ក្រោម​កិច្ចព្រមព្រៀង​សហប្រតិបត្តិ​ការការពា​រ​ជាតិ (EDCA)​។​

​ប្រទេស​ចិន​អះអាង​សិទ្ធិ​អធិបតេយ្យភាព​ស្ទើរតែ​ស្រុង​នៅ​សមុទ្រ​ចិន​ខាងត្បូង​ទាំងមូល​ជាមួយនឹង «​ខ្សែបន្ទាត់​ប្រាំបួន​» នៅលើ​ផែនទី ដែល​លាតសន្ធឹង​ជាង ១.៥០០ គីឡូម៉ែត្រ​ពី​ដីគោក​របស់ខ្លួន និង​កាត់​ចូលទៅក្នុង​តំបន់សេដ្ឋកិច្ចផ្តាច់មុខ​នៃ​ប្រទេស​វៀតណាម ហ្វីលីពីន ម៉ាឡេស៊ី ប្រ៊ុយណេ និង​ឥណ្ឌូនេស៊ី​។ សេចក្តីសម្រេច​របស់​តុលាការ​ម​ជ្ឈ​ត្ត​កម្ម​អន្តរជាតិ ក្នុង​ឆ្នាំ​២០១៦ បាន​ច្រានចោល​ខ្សែបន្ទាត់​នោះ​ថា មិនមាន​មូលដ្ឋាន​ខាង​ផ្លូវច្បាប់​៕​