​អង្គការសហប្រជាជាតិ​(UN)​និយាយថា​ ជាង​ពាក់កណ្តាល​នៃ​ចំនួន​ប្រជាពលរដ្ឋ​សរុប​របស់​ប្រទេស​ស៊ូដង់ បច្ចុប្បន្ន​ត្រូវការ​ជំនួយ​បន្ទាន់ និង​ការការពារ ស្របពេល​ដែល​ជន​ស៊ីវិល​ស្វែងរក​ទីជម្រក​គេច​ពី​ការវាយប្រហារ​តាម​ច្រក​អាកាស និង​ការប៉ះទង្គិច​គ្នា​រវាង​គូប្រជែង​យោធា​នៅក្នុង​ទីក្រុង Khartoum។

​ប្រជាពលរដ្ឋ និយាយថា ថាមពល​អគ្គិសនី ត្រូវបាន​កាត់ផ្តាច់ ការផ្គត់ផ្គង់​ចំណីអាហារ​ជួប​កង្វះខាត ហើយ​ទឹក​ផឹក​មានការ​ក្សត់ខ្សោយ ដោយសារតែ​ការដណ្តើម​អំណាច​គ្នា​ដែល​បច្ចុប្បន្ន​ឈានចូល​ដល់​ខែ​ទី ២​ទៅហើយ បើទោះបី​ជាមាន​កិច្ចខិតខំ​សម្របសម្រួល​ពី​អន្តរជាតិ​ក៏ដោយ។

​អ្នកស្រី Iqbal គឺជា​ពលរដ្ឋ​ស៊ូដង់​ជម្លៀស​ខ្លួន​ម្នាក់ ដែល​ទើបបាន​ធ្វើដំណើរ​ទៅដល់​តំបន់​ព្រំដែន Qustul ស្ថិតនៅក្នុង​ប្រទេស​អេ​ហ្ស៊ី​ប និយាយថា អ្នកស្រី​បង្ខំចិត្ត​ចាកចេញ ក្រោយ​ផ្ទះ​អ្នកជិតខាង​របស់គាត់ ត្រូវ​គ្រាប់​មី​ស៊ី​ល ហើយ​ទឹក និង​ថាមពល​អគ្គិសនី ត្រូវបាន​កាត់ផ្តាច់​ទាំងស្រុង ។

​កម្មវិធី​ស្បៀងអាហារ​ពិភពលោក​(WFP) របស់ UN និយាយថា ពួកគេ​កំពុង​បង្កើន​ប្រតិបត្តិការ​សង្គ្រោះបន្ទាន់​នៅក្នុង​ប្រទេស​ស៊ូដង់ ។ ពួកគេ​សង្ឃឹមថានឹង​អាច​ផ្តល់​ចំណីអាហារ​ដល់​ពលរដ្ឋ​ងាយ​រងគ្រោះ ៤,៩​លាន​នាក់ នៅក្នុង​ប្រទេស​ស៊ូដង់ និង​មនុស្ស​រាប់ម៉ឺន​នាក់​ផ្សេងទៀត ដែល​បាន​រត់​ភៀសខ្លួន​ចេញទៅ​កាន់​ប្រទេសជិតខាង ដូចជា​ប្រទេស​អេ​ហ្ស៊ី​ប ។

WFP​បាន​ចែកចាយ​រួចទៅហើយ​ចំណីអាហារ​ជាង ៦.៥០០​តោន​ទៅកាន់​រដ្ឋ​ជាច្រើន​នៅក្នុង​ប្រទេស​ស៊ូដង់ ពោលគឺ​ជំនួយ​ទាំងអស់នេះ បាន​ទៅដល់​មនុស្ស​ជាង ៣០​ម៉ឺន​នាក់ ។ ពួកគេ​បានចាប់ផ្តើម​ប្រតិបត្តិការ​ជួយសង្គ្រោះ​រប​ស់​ពួកគេ​កាលពី​រយៈពេល ២​សប្តាហ៍​មុន ។

​លោក Michael Dunford គឺជា​ប្រធាន​គ្រប់គ្រង​កម្មវិធី WFP ក្នុង​តំបន់​និយាយថា WFP នឹង​បន្ត​គាំទ្រ​ជនភៀសខ្លួន ពេលដែល​ពួកគេ​ធ្វើដំណើរ​មកដល់ ប៉ុន្តែ​អនាគត​គួរ​ឲ្យ​ព្រួយបារម្ភ​ខ្លាំងណាស់​សម្រាប់​ប្រជាជន​ទាំងអស់នោះ គួរ​ឲ្យ​ព្រួយបារម្ភ​សម្រាប់​ស៊ូដង់ និង​គួរ​ឲ្យ​ព្រួយបារម្ភ​សម្រាប់​តំបន់ ។

​នៅក្នុង​ការអំពាវនាវ​សុំ​ជំនួយ ៣​ពាន់​លាន​ដុល្លារ​របស់​ពួកគេ UN​និយាយថា​មនុស្ស ២៥​លាន​នាក់​ត្រូវការ​ជំនួយ ដែលជា​ចំនួន​មនុស្ស​ច្រើន​បំផុត​ពុំ​ធ្លាប់​ដែលមាន​នៅក្នុង​ប្រទេស​ស៊ូដង់ ជាទី​ដែល​ពលរដ្ឋ​ប្រហែល ១៥​លាន​នាក់ បាន​ត្រូវការ​ជំនួយ​រួចទៅហើយ​មុនពេល​ជម្លោះ​ផ្ទុះឡើង ៕​