​មន្ត្រី​បាន​និយាយ​នៅ​ថ្ងៃ​ព្រហស្បតិ៍​នេះ​ថា មនុស្ស​ម្នាក់​ស្លាប់ ក្នុងការ​វាយប្រហារ​ដោយ​មី​ស៊ី​ល​របស់​រុស្ស៊ី​លើ​អគារ​ឧស្សាហកម្ម​មួយកន្លែង​ក្នុង​ទីក្រុង Odesa ប្រទេស​អ៊ុយ​ក្រែ​ន​ភាគខាងត្បូង ខណៈ​មាន​ធ្លាក់​កម្ទេចកម្ទី​អំឡុង​ការ​វាយឆ្មក់​តាម​អាកាស​បង្ក​ឲ្យ​មាន​អគ្គីភ័យ​២​កន្លែង​ក្នុង​សង្កាត់​ភាគ​ខាងកើត​ទីក្រុង​គី​វ​។

​អ្នកនាំពាក្យ​រដ្ឋបាល​យោធា លោក Serhiy Bratchuk បាន​សរសេរ​នៅលើ​បណ្តាញ​តេ​ឡេ​ក្រាម​ថា មនុស្ស​២​នាក់​ផ្សេងទៀត បាន​រងរបួស ក្នុងការ​វាយប្រហារ​នៅ​ទីក្រុង Odesa​។​

​អភិបាលក្រុង​គី​វ លោក Vitaly Klitschko បាន​សរសេរ​នៅលើ​បណ្តាញ​តេ​ឡេ​ក្រាម​ថា អគ្គិភ័យ​មួយ​បាន​ផ្ទុះឡើង​នៅ​ទីតាំង​យានដ្ឋាន​មួយកន្លែង​ក្នុង​តំបន់ Darnitsya របស់​រដ្ឋធានី​។

​កម្ទេចកម្ទី ក៏បាន​ធ្លាក់​មកលើ​តំបន់​Dnipro រដ្ឋធានី​គី​វ ប៉ុន្តែ​លោក​និយាយថា ពុំមាន​អ្នកស្លាប់​ឬ​រងរបួស​ពី​ឧបត្តិហេតុ​ទាំងពីរ​នោះទេ​។

​ប្រធាន​រដ្ឋបាល​យោធា​ទីក្រុង​គី​វ លោក Serhiy Popko បាន​និយាយ​លើ​បណ្តាញ​តេ​ឡេ​ក្រាម​ថា អគ្គិភ័យ​មួយ​បាន​ផ្ទុះឡើង​នៅ​ទីតាំង​គ្មាន​ពលរដ្ឋ​រស់នៅក្នុង​សង្កាត់ Desnyansky នៅ​ខាងកើត​រដ្ឋធានី ប៉ុន្តែ​លោក​ពុំបាន​ផ្តល់ព័ត៌មាន​ពី​ការស្លាប់​ឬ​រងរបួស​នោះទេ​។​

​លោក Popko និយាយថា ទីក្រុង​គី​វ​ត្រូវបាន​វាយប្រហារ​ដោយ​មី​ស៊ី​ល​តម្រង់​គោលដៅ ហើយ​មី​ស៊ី​ល​ទាំងនោះ ត្រូវបាន​បាញ់​ទម្លាក់​ដោយ​ប្រព័ន្ធ​ការពារ​ដែនអាកាស​៕