​នាយករដ្ឋមន្ត្រី​កាណាដា​លោក Justin Trudeau និង​ប្រធានាធិបតី​កូរ៉េខាងត្បូង​លោក Yoon Suk Yeol បាន​បើក​កិច្ចប្រជុំ​កំពូល​នៅ​ទីក្រុង​សេ​អ៊ូ​ល​កាលពី​ថ្ងៃ​ពុធ (១៧ ឧសភា​) ខណៈដែល​ប្រទេស​ទាំងពីរ​រិះរក​វិធី​ពង្រីក​ទំនាក់ទំនង​សន្តិសុខ រួមទាំង​ការចែករំលែក​ព័ត៌មាន​ចារកម្ម​សម្ងាត់ ខណៈពេលដែល​កំពុង​ស្វែងយល់​ពី​ការប្រកួតប្រជែង​រវាង​សហរដ្ឋអាមេរិក និង​ចិន​។​

​ប្រទេស​ទាំងពីរ​នេះ កំពុង​ប្រារព្ធ​ខួប​លើក​ទី ៦០ នៃ​ទំនាក់ទំនង​ទ្វេភាគី​នៅ​ឆ្នាំនេះ​។ ភាគី​ទាំងពីរ​នឹង​ចេញ​សេចក្តីថ្លែងការណ៍​រួមមួយ​ដែល​បង្ហាញ​ពី​ភាពជា​ដៃគូ​របស់ខ្លួន​សម្រាប់រ​យៈ​ពេល ៦០ ឆ្នាំ​ខាងមុខ នេះ​បើតាម​ទីប្រឹក្សា​រង​សន្តិសុខ​ជាតិ​របស់លោក Yoon គឺ​លោក Kim Tae-hyo បាន​និយាយ​កាលពី​ថ្ងៃ​អង្គារ (១៦ ឧសភា​)​។​

​កាលពី​ព្រឹក​ថ្ងៃ​ពុធ មេដឹកនាំ​កាណាដា​បាន​ប្រាប់​សភា​កូរ៉េខាងត្បូង​ថា ប្រទេស​របស់លោក បាន​ត្រៀមខ្លួន​ជាស្រេច​ដើម្បី​ធ្វើជា​ដៃគូ​ជាមួយ​កូរ៉េខាងត្បូង​លើ​គម្រោង​រ៉ែ​សំខាន់ៗ និង​ថាមពល​ស្អាត ព្រមទាំង​ដើម្បី​ការពារ​ការគំរាមកំហែង​នុយក្លេអ៊ែរ និង​មី​ស៊ី​ល​របស់​កូរ៉េខាងជើង​។

​លោក Trudeau បាន​ទៅដល់​ទីក្រុង​សេ​អ៊ូ​ល​កាលពី​ថ្ងៃ​អង្គារ​សម្រាប់​ដំណើរ​ទស្សនកិច្ច​លើកដំបូង​ក្នុង​រយៈពេល​ប្រាំបួន​ឆ្នាំ​ដោយ​មេដឹកនាំ​កាណាដា​៕​