ជម្លោះយោធារយៈពេល៥ថ្ងៃ រវាងក្រុមប៉ាឡេស្ទីនប្រដាប់អាវុធ និងកងទ័ពអ៊ីស្រាអែល បណ្តាលឲ្យមានការជម្លៀសខ្លួនមនុស្សដ៏ច្រើន និងបំផ្លាញហេដ្ឋារចនាសម្ព័ន្ធដល់ពលរដ្ឋប៉ាឡេស្ទីន នៅមុនបទឈប់បាញ់ដ៏ផុយស្រួយត្រូវបានព្រមព្រៀងដែលបានបន្ថែមទុក្ខលំបាកដល់តំបន់ហ្គាហ្សា ជាតំបន់ឆ្នេររងការបំផ្លិចបំផ្លាញដោយសង្គ្រាម ក្នុងកិច្ចប្រឹងប្រែងកសាងឡើងវិញជាបណ្តើៗរបស់ខ្លួន។

យោងតាមស្ថិតិរបស់អាជ្ញាធរលំនៅឋានប៉ាឡេស្ទីនក្នុងតំបន់ហ្គាហ្សា បានឲ្យដឹងថា ជម្លោះបង្ហូរឈាម    រយៈពេល៥ថ្ងៃ បានបណ្តាលឲ្យមានការបំផ្លាញលំនៅឋានជនស៊ីវិលយ៉ាងច្រើន។ ក្នុងចំណោមលំនៅឋានទាំងនោះ លំនៅឋានជាង២០០ខ្នង ត្រូវបានបំផ្លាញទាំងស្រុង ហើយចាំបាច់ត្រូវរុះរើ ខណៈលំនៅឋាន ជាង២.៧០០ខ្នង ត្រូវបានបំផ្លាញដោយផ្នែក។

ការខាតបង់សរុប មានលើសពី១០លានដុល្លាអាមេរិក។ នៅក្នុងបទសម្ភាសន៍ជាមួយទូរទស្សន៍រដ្ឋចិន CCTV បានឲ្យដឹងថា លោក Jawad Al-Agha អនុរដ្ឋមន្ត្រីក្រសួងសាធារណៈការនិងលំនៅឋាន ក្នុងតំបន់ហ្គាហ្សា និយាយថា អាជ្ញាធរតំបន់ បានព្យាយាមផ្តល់កន្លែងស្នាក់នៅដល់ពលរដ្ឋជម្លៀសខ្លួន ខណៈកំពុងអំពាវនាវដល់សហគមន៍អន្តរជាតិដើម្បីផ្តល់ជំនួយបន្ថែម។  

ជាលទ្ធផលនៃការបំផ្លាញលំនៅឋាន ពលរដ្ឋជាង១ពាន់នាក់មកពី២០០គ្រួសារក្នុងតំបន់ហ្គាហ្សា គ្មានលំនៅឋានរស់នៅ។ លោក Al-Agha និយាយថាអាជ្ញាធរតំបន់កំពុងធ្វើការដើម្បីប្រមូលមូលនិធិ ក្នុងការ ផ្តល់ជំនួយការសាងសង់លំនៅឋានបណ្តោះអាសន្ន និងផ្តល់អត្ថប្រយោជន៍ដល់ពលរដ្ឋរងផលប៉ះពាល់លើមូលដ្ឋានប្រចាំខែសម្រាប់ការតាំងលំនៅបណ្តោះអាសន្នរបស់ពួកគេ។