អគ្គលេខាធិការអង្គការសហប្រជាជាតិ ឬUN លោក Antonio Guterres កាលពីថ្ងៃពុធ បានស្វាគមន៍ការសម្រេចចិត្តរបស់ប្រទេសរុស្ស៊ី ដែលនឹងអនុញ្ញាតឲ្យមានការបន្ថែមពេលវេលាចំពោះគំនិតផ្តួចផ្តើមគ្រាប់ធញ្ញជាតិសមុទ្រខ្មៅ ដែលអនុញ្ញាតឲ្យមានការនាំចេញគ្រាប់ធញ្ញជាតិពីប្រទេសអ៊ុយក្រែន និងផលិតផលកសិកម្មផ្សេងទៀតពីកំពង់ផែសមុទ្រខ្មៅ។

លោក Guterres បានថ្លែងថា៖ «យើងមានការវិវឌ្ឍន៍ជាវិជ្ជមាន និងសំខាន់ៗមួយចំនួន ពោលគឺការបញ្ជាក់អះអាងរបស់សហព័ន្ធរុស្ស៊ី ដើម្បីបន្តការចូលរួមរបស់ខ្លួន ក្នុងគំនិតផ្តួចផ្តើមសមុទ្រខ្មៅ សម្រាប់រយៈពេល៦០ថ្ងៃទៀត។ ខ្ញុំសូមស្វាគមន៍ការសម្រេចចិត្តនេះ។ ការព្រមព្រៀងបន្តនេះ គឺជាដំណឹងល្អសម្រាប់ពិភពលោកទាំងមូល»។

លោកបានប្រាប់អ្នកយកព័ត៌មាននៅឯទីស្នាក់ការកណ្តាលរបស់អង្គការសហប្រជាជាតិ ឬUN ក្នុងទីក្រុងញូវយ៉កថា បញ្ហាធំៗ នៅតែមាន ប៉ុន្តែតំណាងនៃប្រទេសរុស្ស៊ី អ៊ុយក្រែន ទួរគី និងអង្គការសហប្រជាជាតិ នឹងបន្តពិភាក្សាអំពីបញ្ហាទាំងនោះ។ លោកបានបន្ថែមថារូបលោកសង្ឃឹមថា កិច្ចព្រមព្រៀងដ៏ទូលំទូលាយមួយ នឹងត្រូវលេចរូបរាងឡើង ដើម្បីកែលម្អ ពង្រីក និងបន្តគំនិតផ្តួចផ្តើម ដូចដែលលោកបានស្នើ នៅក្នុងលិខិតនាពេលថ្មីៗនេះ ទៅកាន់ប្រធានាធិបតីនៃប្រទេសទាំងបី។

ក្រោមគំនិតផ្តួចផ្តើមគ្រាប់ធញ្ញជាតិសមុទ្រខ្មៅ ស្បៀងជាង ៣០លានតោន ត្រូវបាននាំចេញ ហើយប្រធានអង្គការសហប្រជាជាតិរូបនេះ បានបញ្ជាក់ថា ការផ្គត់ផ្គង់ស្បៀងសំខាន់ៗ កំពុងទៅដល់ប្រជាជន និងទីកន្លែងដែលងាយរងគ្រោះបំផុតរបស់ពិភពលោក ក្នុងនោះរួមទាំងស្រូវសាឡីចំនួន ៣០ ០០០តោន ដែលទើបតែចាកចេញពីប្រទេសអ៊ុយក្រែន ដើម្បីយកទៅផ្គត់ផ្គង់ប្រជាជន ដែលជួបប្រទះនូវភាពអត់ឈ្លាន ក្នុងប្រទេសស៊ូដង់៕