ជារៀងរាល់ព្រឹក នៅរដូវក្តៅ ស្ត្រី និងកុមារ ក្នុងភូមិដ៏តូច Telamwadi ក្នុងប្រទេសឥណ្ឌា នាំគ្នាដើរចម្ងាយប្រហែល ២គីឡូម៉ែត្រ ដើម្បីទៅយកទឹកពីអណ្តូងរីងស្ងួត ដែលកំពុងត្រូវបានបំពេញដោយទឹកពីរថយន្តដឹកទឹក។

ការទីតាំងលំនៅឋាននេះ មានចម្ងាយប្រហែល ១៥០គីឡូម៉ែត្រ ភាគខាងជើង Mumbai ដែលជាក្រុងហិរញ្ញវត្ថុរបស់ប្រទេសឥណ្ឌា គឺមិនឆ្ងាយពីទំនប់ ដែលផ្គត់ផ្គង់ទឹកដល់ទីក្រុងធំនោះទេ។

តែយ៉ាងណាក្ដី អ្នកស្រុកប្រឈមនឹងការខ្វះខាតទឹកយ៉ាងធ្ងន់ធ្ងរ នៅចន្លោះរដូវនៃខែមីនា និងឧសភា ជារៀងរាល់ឆ្នាំ នៅពេលដែលសីតុណ្ហភាពអាចឡើងដល់ ៤០អង្សាសេ ដោយសារប្រជាជនទាំងនោះ មិនអាចយកទឹកពីទន្លេមកប្រើប្រាស់បាន។

យោងតាមធនាគារពិភពលោក ឥណ្ឌា ជាប្រទេសដែលមានប្រជាជនច្រើនជាងគេលើពិភពលោក មាន ១៨% នៃចំនួនប្រជាជនពិភពលោក ប៉ុន្តែមានតែ ៤% ប៉ុណ្ណោះនៃធនធានទឹករបស់ខ្លួន ដែលធ្វើឲ្យក្លាយជាប្រទេសមួយ ក្នុងចំណោមប្រទេស ដែលខ្វះខាតទឹកច្រើនជាងគេបំផុត។

លោក Ashok Amey Shinde អ្នករស់នៅភូមិដ៏តូចមួយ ដែលជាលំនៅរបស់មនុស្សប្រមាណ ៧០០នាក់ និងសត្វបក្សាបក្សី ហើយនិងបសុសត្វ បាននិយាយថា៖ «រដ្ឋាភិបាលលើកទឹកចិត្តឲ្យពួកយើងចិញ្ចឹមសត្វផ្សេងៗ ប៉ុន្តែតើយើងនឹងឲ្យពួកវាផឹកអ្វី បើសូម្បីតែយើងខ្លួនឯង ក៏មិនមានទឹកបរិភោគដែរនោះ»។

ក្រុមអ្នកស្រុក ដែលភាគច្រើនជាស្ត្រី និងខ្លះជាកុមារ បានទៅដងទឹកដោយប្រើធុងទឹក និងខ្សែយោង ដោយអ្នកខ្លះថែមទាំងឡើងជញ្ជាំងកម្ពស់ ៥ម៉ែត្រ ដោយដៃ និងជើងទទេ ដើម្បីចុះទៅយកឧបករណ៍ដែលធ្លាក់ទៅក្នុងអណ្ដូង៕