​​ប្រណាំង​កង់៖ ​ព្រឹត្តិការណ៍​ប្រណាំង​កង់​ធំ​ប្រចាំ​ឆ្នាំ​របស់​ព្រឹត្តិការណ៍ Grand Tour, Giro d’Italia បាន​បង្ហាញ​សមាសភាព​ក្រុម​ប្រណាំង​កង់​ទាំង ២៣ ដែល​នឹង​ចូលរួម​ការប្រកួត​លើក​ទី ១០៤ ឆ្នាំ​នៅ​ទីក្រុង​ប្រទេស​អ៊ីតាលី​ថ្ងៃ​ព្រហស្បតិ៍​ម្សិលមិញ​។​

​​Giro d’Italia ជា​ព្រឹត្តិការណ៍​ប្រណាំង​កង់​ដ៏​ធំ​មួយ​ប្រចាំ​ឆ្នាំ​បន្ទាប់ពី Tour de France និង Vuelta a Espana ខណៈ​ព្រឹត្តិការណ៍​ប្រណាំង​កង់​លើ​ទឹកដី​អ៊ីតាលី​មួយ​នេះ ​មាន​អាយុ​កាល​ដល់​ទៅ ១០៤ឆ្នាំ​ហើយ​មកដល់ពេលនេះ​។​ ​ការប្រកួត​ដែល​មាន​សរុប​ដល់​ទៅ ២១ដំណាក់​កាលដែល​នឹង​បញ្ចប់​នៅ​ទីក្រុង Milan ថ្ងៃអាទិត្យ ​ទី​៣០ ខែ​ឧសភា​នេះ ការប្រកួត​នឹង​ចាប់ផ្ដើម​ដំណាក់កាល​ដំបូង​នៅ​ថ្ងៃ​សៅរ៍​ចុង​សប្ដាហ៍​នេះ​ហើយ ​ដែល​ជា​ដំណាក់កាល​ប្រណាំង​យក​ថេរវេលា​ផ្ទាល់ខ្លួន​លើ​ចម្ងាយ​ផ្លូវ ៨.៦​គីឡូម៉ែត្រ​នៅ​ក្នុង​ទីក្រុង Turin​។​

​​បន្ទាប់មក​ថ្ងៃអាទិត្យ​ជា​ដំណាក់កាល​ទី​២ ​ដែល​ចេញដំណើរ​ពី​ទីក្រុង Turin ឆ្ពោះ​ទៅ Novara មាន​ចម្ងាយ​ផ្លូវ ១៧៩​គីឡូម៉ែត្រ​។ ​ក្រុម​ប្រណាំង Ineos Grenadiers ដែល​ពី​មុនគេ​ស្គាល់​ថា ​ក្រុម Team Sky នោះ​គឺជា​ជើងឯក​កាលពី​ឆ្នាំ​២០២០ កន្លងមក ខណៈ​កីឡាករ​អង់គ្លេស Tao Geoghegan Hart គឺជា​ជើងឯក​៕

​អត្ថបទ​៖​នាង សុភា​វុ​ធ