ប្រធានគណបក្សអង្គការរួបរួមជាតិម៉ាឡេ (UMNO) លោក Ahmad Zahid Hamidi បាននិយាយ នៅថ្ងៃព្រហស្បតិ៍ (ទី១៨ ខែឧសភា) នេះថា អតីតរដ្ឋមន្ត្រីសុខាភិបាលម៉ាឡេស៊ី លោក Khairy Jamaluddin មានសេរីភាពពេញលេញ ក្នុងការចូលរួមគណបក្សនយោបាយណាក៏បាននៅពេលនេះ ដោយសារអតីតរដ្ឋមន្ត្រីរូបនេះ លែងជាសមាជិកនៃគណបក្សរបស់លោកហើយ។ 

លោក Ahmad Zahid ដែលជាឧបនាយករដ្ឋមន្ត្រីរបស់ប្រទេសម៉ាឡេស៊ី បានប្រាប់ថា ឥឡូវនេះ លោក Khairy ជាបុគ្គលឯករាជ្យបន្ទាប់ពីត្រូវបានលុបឈ្មោះចេញពីគណបក្សអង្គការរួបរួមជាតិម៉ាឡេ (UMNO) កាលពីខែមករា។

លោកប្រធានគណបក្សរូបនេះ ត្រូវកាសែត Malay Mail ដកស្រង់សម្ដី ដែលនិយាយថា៖ «នេះគឺសិទ្ធិរបស់គាត់ (លោក Jamaluddin) ដែលចង់ទៅ និងធ្វើអ្វីក៏បាន។ គាត់លែងជាសមាជិករបស់គណបក្សអង្គការរួបរួមជាតិ (UMNO) ទៀតហើយ»។

យោងតាមសារព័ត៌មានអនឡាន Free Malaysia Today (FMT) បានឲ្យដឹងថា កាលពីថ្ងៃពុធ ប្រធានគណបក្ស Parti Pribumi Bersatu Malaysia (Bersatu) លោក Muhyiddin Yassin បាននិយាយក្នុងសន្និសីទសារព័ត៌មានថា កៅអីនៅក្នុងក្រុមប្រឹក្សាជាន់ខ្ពស់របស់គណបក្ស អាចមានសម្រាប់លោក Khairy ប្រសិនបើគាត់មានបំណងចង់បាន»។

លោក Khairy ត្រូវបានបណ្តេញចេញពីគណបក្សក្នុងខែមករា ដែលជាផ្នែកមួយនៃ«ការបោសសម្អាតទ្រង់ទ្រាយធំ» ដែលគំរាមដោយលោក Ahmad Zahid ដើម្បីកម្ចាត់ «វិច្ឆេទករ»។ យោងតាមសេចក្តីថ្លែងការណ៍មួយដែលបានចេញផ្សាយនៅថ្ងៃទី២៧ ខែមករា បន្ទាប់ពីកិច្ចប្រជុំក្រុមប្រឹក្សាកំពូលរបស់គណបក្ស អគ្គលេខាធិការបក្សអង្គការរួបរួមជាតិ (UMNO) លោក Ahmad Maslan បាននិយាយថា លោក Khairy ត្រូវបានដកចេញពីតំណែង ដោយសារបទបំពានគោលការណ៍វិន័យរបស់បក្ស៕