ភ្នំពេញ៖ នាយឧត្តមសេនីយ៍ ផន ណារ៉ា អគ្គលេខាធិការ អាជ្ញាធរជាតិអាវុធគីមី បានថ្លែងថា អាជ្ញាធរជាតិអាវុធគីមី នឹងធ្វើការបំពាក់សម្ភារៈបច្ចេកទេសសម្រាប់បំរើការលើជំនាញគីមីនេះ ឲ្យបានល្អបន្ថែមទៀតស្របទៅតាមស្តង់ដាអន្តរជាតិ ខណៈបច្ចុប្បន្នទាំងសម្ភារៈ និងសមត្ថភាពនៅមានកម្រិតនៅឡើយ។

ថ្លែងនៅក្នុងពិធីពិធីបិទវគ្គហ្វឹកហ្វឺនកម្លាំងឆ្លើយ​តប​ឧប្បត្តិហេតុ ដែលបង្កឡើង ដោយសារធាតុគីមី អាវុធគីមី នុយក្លេអ៊ែរ ជីវសាស្រ្ត និងវិទ្យុសកម្មជំនាន់ទី៣ វគ្គបំប៉នមូលដ្ឋានគ្រឹះ ​សារធាតុគីមី និងច្បាប់ជំនាន់ទី២ ​និងវគ្គបំប៉នមូលដ្ឋានគ្រឹះនុយក្លេអ៊ែរជំនាន់ទី១ ឆ្នាំ២០២២ និងបើកវគ្គហ្វឹកហ្វឺន​ឆ្នាំ២០២៣ នៅទីស្តីការក្រសួងការពារជាតិ ​នារសៀលថ្ងៃទី១៨ ​ខែឧសភា ឆ្នាំ២០២៣នេះ នាយឧត្តមសេនីយ៍ ផន ណារ៉ា ​បានលើកឡើងថា ​ដើម្បីឆ្លើយតបនឹងការងារឲ្យបានឆាប់រហ័សនោះ អាជ្ញាធរជាតិអាវុធគីមី នៃក្រសួងការពារជាតិនឹងបង្កើនសមត្ថភាពនៅក្នុងអង្គភាពបន្ថែមទៀត ទាំងធនធាន និងសម្ភារៈ។

នាយឧត្តមសេនីយ៍ បានបញ្ជាក់ថា នាពេលអនាគតដ៏ខ្លីខាងមុខនេះ យើងក៏ត្រូវរៀបចំចាត់ចែង ក្រុមកម្លាំងឆ្លើយតបនេះឲ្យមានប្រសិទ្ធភាពខ្ពស់បន្ថែមទៀតតាមស្តង់ដា អ៊ីយូ ទាំងសមត្ថភាព សម្ភារៈ និងគ្រឿងបំពាក់ផ្សេងៗទៀត ដែលជាជំនួយបរទេសផង​នឹង​ជារបស់ក្រសួងការពារជាតិ​ផ្តល់ជូនផង។

នៅក្នុងពិធីនោះដែរ នាយឧត្តមសេនីយ៍អគ្គលេខាធិការ ក៏បានជម្រុញដល់នាយទាហាន នាយទាហានរង ​និងពលទាហាននៅក្នុងអង្គភាពទាំងអស់ត្រូវខិតខំបង្កើនសមត្ថភាព​របស់ខ្លួន​លើជំនាញអាវុធគីមីនេះឲ្យបានកាន់តែល្អបន្ថែមទៀតផងដែរ ​ដើម្បីរួមចំណែក​ការពារសន្តិសុខជាតិ និងសុវត្ថិភាពរបស់បង​ ប្អូនប្រជាពលរដ្ឋយើងទាំងមូល។

នៅក្នុងកម្មវិធីនោះដែរ នាយឧត្តមសេនីយ៍ ផន ណារ៉ា ក៏បានអំពាវនាវដល់នាយទាហាន នាយទា ហានរង ​និងពលទាហានដែលនៅក្នុងអង្គភាពទាំងអស់ត្រូវទៅចូលរួមបោះឆ្នោត​តំណាងរាស្រ្ត​អាណត្តិទី៧ ដែលនឹងប្រព្រឹត្តទៅនាថ្ងៃទី២៣ ​ខែកក្កដា​ ឆ្នាំ២០២៣នេះផងដែរ ​ដោយក្នុងនោះ​នាយឧត្តមសេនីយ៍បាន ​អំពាវនាវដល់មន្រ្តីក្រោមឱវាទ​ទាំងអស់បន្តបោះឆ្នោតគាំទ្រ​សម្តេចតេជោ ហ៊ុន សែន ​ដែលជាប្រធានគណបក្សប្រជាជនកម្ពុជា ធ្វើជានាយករដ្ឋមន្រ្តីបន្តទៀតផងដែរ ខណៈក្រោម​ការ​ដឹកនាំរបស់សម្តេចតេជោ ​ហ៊ុន សែន ​បានធ្វើឲ្យប្រទេសមានសុខសន្តិភាព និងការអភិវឌ្ឍជាបន្តបន្ទាប់នោះ៕អត្ថបទ៖ បាន ចក់