ភ្នំពេញ៖ ឯកឧត្តម អ៊ូអិណុ អាត់ស៊ូស៊ី ( UENO Atsushi ) ឯកអគ្គរាជទូតជប៉ុន ប្រចាំនៅព្រះរាជាណាចក្រកម្ពុជា បានថ្លែងថា កម្ពុជាមានការអភិវឌ្ឍយ៉ាងឆាប់រហ័ស ក្នុងរយៈពេលប៉ុន្មានឆ្នាំចុងក្រោយនេះ ទាំងនៅទីក្រុង ទីប្រជុំជន និងនៅទីជនបទ។

ក្នុងជំនួបសម្ដែងការគួរសម និងពិភាក្សាការងារជាមួយឯកឧត្ដមបណ្ឌិតសភាចារ្យ អ៊ុក រ៉ាប៊ុន រដ្ឋមន្រ្ដីក្រសួងអភិវឌ្ឍន៍ជនបទ រសៀលថ្ងៃទី១៨ ខែឧសភា ឆ្នាំ២០២៣ នៅទីស្តីការក្រសួង ឯកឧត្តមរដ្ឋមន្រ្ដី បានសម្ដែងការស្វាគមន៍ និងអបអរសាទរចំពោះលោក UENO Atsushi ដែលត្រូវបានរដ្ឋាភិបាលជប៉ុន ចាត់បញ្ជូនមកបំពេញបេសកកម្មការទូត នៅព្រះរាជាណាចក្រកម្ពុជា ដែលជាខួបលើកទី៧០ នៃទំនាក់ទំនងការទូតរវាងប្រទេសទាំងពីរ។

ជាមួយនេះ ឯកឧត្តមរដ្ឋមន្ត្រីក៏បានថ្លែងអំណរគុណចំពោះឯកឧត្ដម ឯកអគ្គរាជទូត និងសហការី​ដែលបានអញ្ជើញមកជួបពិភាក្សាការងារនាពេលនេះ​ បានបញ្ជាក់ឲ្យឃើញពីកិច្ចសហប្រតិបត្តិការ រវាងប្រទេសទាំងពីរដែលមានតាំងពីរឆ្នាំ១៩៩៣មក​ ហើយមានភាពរឹងមាំ​ជាប្រវត្តិសាស្រ្ដ។

ក្នុងឱកាសនោះឯកឧត្តម UENO Atsushi ឯកអគ្គរាជទូតជប៉ុន ​ប្រចាំនៅព្រះរាជាណាចក្រកម្ពុជា បានថ្លែងថា ក្នុងរយៈពេលប៉ុន្មានខែដែរលោកបានបំពេញបេសកកម្មនៅកម្ពុជា លោកបានធ្វើដំណើរ​ទៅតាមបណ្ដាខេត្តចំនួន១០​ នៃកម្ពុជា ​ដើម្បីស្វែងយល់ពីតម្រូវការរបស់ប្រជាពលរដ្ឋនៅជនបទ និង​បានកត់សម្គាល់ថា​ កម្ពុជាមានការអភិវឌ្ឍយ៉ាងឆាប់រហ័ស​ ក្នុងរយៈពេលប៉ុន្មានឆ្នាំចុងក្រោយនេះ ទាំងនៅទីក្រុង ទីប្រជុំជន និងនៅទីជនបទ។

ឯកឧត្ដមបណ្ឌិតសភាចារ្យ អ៊ុក រ៉ាប៊ុន ក៏បានជម្រាបជូនពីបេសកកម្មរបស់ក្រសួងអភិវឌ្ឍន៍ជនបទ ធ្វើយ៉ាងណាឲ្យជីវភាពរបស់ប្រជាពលរដ្ឋនៅជនបទ ​មានភាពធូធារ ស៊ីវីល័យ​ ទាំងផ្នែកសេដ្ឋកិច្ច សង្គមកិច្ច និងវប្បធម៌។ ការលើកកម្ពស់កម្រិតជីវភាពរស់នៅ​ របស់ប្រជាពលរដ្ឋនៅជនបទ គឺតាម​រយៈការស្ដារ និងកសាងហេដ្ឋារចនាសម្ព័ន្ធ ​និងការផ្គតផ្គង់ទឹកស្អាត និង​អនាម័យ​ដែលជាឆ្អឹងខ្នង​សេដ្ឋកិច្ចដ៏សំខាន់​ របស់ប្រជាកសិករនៅជនបទ។

ការផ្គតផ្គង់ទឹកស្អាត​ និងអនាម័យជនបទ សម្រេចឲ្យបាន ​១០០% នៅឆ្នាំ២០២៥ ជាទស្សនវិស័យរបស់រាជរដ្ឋាភិបាល ក៏ដូចជាទិសដៅប្រកបដោយចិរភាពរបស់អង្គការ​សហប្រជាជាតិ៕អត្ថបទ៖ ចេន សុជាតា