ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងថ្នាក់ដឹកនាំ នៅរសៀលថ្ងៃទី១៨ ខែឧសភា ឆ្នាំ២០២៣នេះ បានប្រជុំពិភាក្សាលើការផ្ទេរមុខងារ និងធនធាន (មនុស្ស ហិរញ្ញវត្ថុ ទ្រព្យសម្បត្តិ) ក្នុងវិស័យព្រៃឈើ និងជលផលទៅឱ្យរដ្ឋបាលថ្នាក់ក្រោមជាតិ នៅទីស្តីការក្រសួង។

ប្រភពពីក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា នៅក្នុងកិច្ចប្រជុំនេះ ឯកឧត្តមរដ្ឋមន្ត្រី ​បានណែនាំដល់ក្រុមការងារនៃអនុវិស័យព្រៃឈើ​ និងជលផល ត្រូវ​ពិនិត្យខ្លឹមសារអនុក្រឹត្យឱ្យបានល្អិតល្អន់ ​និងត្រូវបន្តយកចិត្តទុកដាក់ធ្វើការងារតាមជំនាញ បច្ចេកទេស​ឱ្យបានត្រឹមត្រូវ ពិសេសការផ្តល់សេវាសាធារណៈឱ្យកាន់តែមានប្រសិទ្ធភាព បន្ទាប់ពីការធ្វើប្រតិភូកម្មទៅថ្នាក់ក្រោមជាតិស្ថិតក្រោមការគ្រប់គ្រងរបស់ខេត្ត។

លើសពីនេះទៀត ត្រូវមានការចូលរួមនិងសហការល្អ ​ដោយតម្កល់ប្រយោជន៍ជាតិជាធំ មើល​បញ្ហាឱ្យចំទិសដៅ និងរួមគ្នាស្វែងរកដំណោះស្រាយឱ្យមានប្រសិទ្ធភាព ​និងនិរន្តរភាព តាមរយៈយន្តការត្រួតពិនិត្យ តាមដាន ​និងវាយតម្លៃច្បាស់លាស់ ដើម្បីការពារ និងអភិរក្សធនធានធម្មជាតិ៕