កាលពីថ្ងៃព្រហស្បតិ៍ម្សិលមិញ ប្រមុខរដ្ឋបណ្តាប្រទេសនៅអាស៊ីកណ្តាល បានជួបជុំគ្នា​នៅ​ក្នុងទីក្រុងប្រវត្តិសាស្រ្ត Xian ប្រទេសចិន សម្រាប់ជំនួបទល់​មុខគ្នាជាមួយមេដឹកនាំចិនលោក Xi Jinping ដោយសង្ឃឹមថានឹងទទួលបានការសន្យាចំពោះមិត្តភាពឋិតឋេរយូរអង្វែង ក៏ដូចជា​ត្រួសត្រាយផ្លូវ​សម្រាប់កិច្ចប្រជុំកំពូល ដែលគេរំពឹងថា នឹងទទួលបានកិច្ចព្រមព្រៀងក្នុងតំបន់​ជាមួយទីក្រុងប៉េកាំង ។

ក្រសួងការបរទេសចិន និយាយថា ជំនួបទ្វេភាគី នឹងរៀបចំឡើងជាក្រុមនៅថ្ងៃសុក្រនេះ ដែលជាជំនួបផ្ទាល់លើកដំបូងរបស់ក្រុមមេដឹកនាំអាស៊ីកណ្តាលទាំង ៦ប្រទេស ជាទីដែលលោក Xiនឹងថ្លែងសុន្ទរកថាសំខាន់ ។ ឯកសារនយោបាយសំខាន់ៗ នឹងត្រូវចុះហត្ថលេខាផងដែរ ។

នៅទូទាំងទីក្រុង Xian ដោយសារថាកន្លែងផ្លូវសូត្របុរាណ(Silk Road) មានប្រវត្តិទាក់ទិននឹងអរិយធម៌អធិរាជចិន រហូតដល់ផ្លូវភាគខាងលិចដែលមានអាយុកាលជាង ១សហវត្សរ៍ បដា ផ្ទាំងប៉ាណូ ហើយសូម្បីតែស្លាកសញ្ញារថយន្តតាក់ស៊ី ក៏មានផ្សព្វផ្សាយកិច្ចប្រជុំកំពូលនេះផងដែរ ។

បច្ចុប្បន្នចិន កំពុងបង្កើនការចូលរួមសេដ្ឋកិច្ច និងនយោបាយរបស់ខ្លួនជាមួយអតីតរដ្ឋសហភាពសូវៀតទាំងនេះ ស្របពេលរុស្ស៊ីបញ្ជូនធនធានដែលពួកគេមានចូលទៅក្នុងសង្រ្គាមនៅអ៊ុយក្រែន ។ រដ្ឋនៅអាស៊ីកណ្តាលមួយចំនួន ក្រោកឈរប្រឆាំងទីក្រុងម៉ូស្គូ ក្នុងនោះប្រទេសកាហ្សាក់ស្ថាន ពុំទទួលស្គាល់តំបន់គ្រប់គ្រងដោយរុស្ស៊ីនោះឡើយ នៅតំបន់ភាគខាងកើតអ៊ុយក្រែន ហើយប្រទេសតាហ្ស៊ីគីស្ថាន ទាមទារឲ្យមានការគោរពច្រើនជាងនេះ ពីវិមានក្រឹមឡាំង ។

សូមបញ្ជាក់ថា ប្រមុខរដ្ឋដំបូងគេដែលបានមកដល់ទីក្រុង Xian គឺប្រធានាធិបតីកាហ្សាក់ស្ថានលោក Kassym-Jomart Tokayevដែលប្រទេសរបស់លោក គឺជាដៃគូពាណិជ្ជកម្មធំបំផុតរបស់ចិននៅអាស៊ីកណ្តាល ។ ពេលលោក Tokayev ជួប លោក Xi មេដឹកនាំចិនរូបនេះ បានស្វាគមន៍រូបលោកយ៉ាងកក់ក្តៅ និងបានជូនពរគាត់នៅថ្ងៃខួបកំណើតលើកទី ៧០ របស់គាត់ ៕