​ការស្ទង់មតិ​ប្រចាំឆ្នាំ​ពី​មូលនិធិ Asian American Foundation បង្ហាញ​ឲ្យ​ឃើញ​ពី​ផលប៉ះពាល់ ដែល​កើតមាន​ពី​ទម្លាប់​ជា​អចិន្ត្រៃយ៍ ប្រឆាំងនឹង​ជនជាតិ​អាមេរិក​ដើមកំណើត​អាស៊ី នៅ​សហរដ្ឋអាមេរិក​។​

​ការស្ទង់មតិ​បាន​រកឃើញថា ម្នាក់​ក្នុងចំណោម​ជនជាតិ​អាមេរិក​ដើមកំណើត​អាស៊ី ២​នាក់ និយាយថា ពួកគេ​មាន​អារម្មណ៍​ថា មិនមាន​សុវត្ថិភាព ក្នុងការ​រស់នៅ​សហរដ្ឋអាមេរិក​។ ស្ទើរតែ​៤​នាក់​ទៅហើយ ក្នុងចំណោម​៥​នាក់ ឬ​ជិត ៨០% ប្រាប់ថា ពួកគេ​មិនមាន​អារម្មណ៍​ថា​ខ្លួន​មាន​ចំណែក​ជា​ម្ចាស់​ប្រទេស ឬ​ត្រូវបាន​ទទួលស្គាល់​។ យុវជន និង​ស្ត្រី​អាមេរិក​ដើមកំណើត​អាស៊ី ដោយ​ភាគច្រើន​ទំនងជា​ធ្លាប់​ជួបប្រទះ​នឹង​ស្ថានភាព​ដែលថា​ខ្លួនឯង​ខុសពី​គេ​។​

​អ្នកឆ្លើយ​សំណួរ​បាន​និយាយថា មូលហេតុ​រួម​ធំ​បំផុត​នៃ​អារម្មណ៍​ទាំងនេះ គឺ​ការរើសអើង​ដោយផ្ទាល់​ដោយសារតែ​ជាតិ​សាសន៍​របស់ខ្លួន និង​ការខ្វះ​ភាពជា​តំណាង​ពី​ថ្នាក់ដឹកនាំ​។ ចំណែកឯ ៨៣% នៃ​អ្នក​ដែល​ឆ្លើយតប បាន​យល់ឃើញថា ប្រទេស​ចិន​ជាការ​គំរាមកំហែង​សន្តិសុខ​ជាតិ ៧៩% នៃ​អ្នក​ឆ្លើយតប​មិន​គិតថា មនុស្ស​ដែលមាន​ដើមកំណើត​ចិន រស់នៅក្នុង​សហរដ្ឋអាមេរិក បាន​បង្ក​ការគំរាមកំហែង​ដល់​សហរដ្ឋអាមេរិក​នោះឡើយ​។​

​លោក Norman Chen នាយក​ប្រតិបត្តិ​នៃ​មូលនិធិ Asian American Foundation បាន​និយាយថា​៖ «​ជា​រឿង​គួរ​ឲ្យ​ភ្ញាក់ផ្អើល​ណាស់ ដែល​ឃើញ​ជនជាតិ​អាមេរិក​លើសពី​ម្នាក់ ក្នុងចំណោម ៤​នាក់ នៅតែ​គិតថា ជនជាតិ​អាមេរិក​ដើមកំណើត​អាស៊ី មាន​ភាពស្មោះត្រង់​ចំពោះ​ប្រទេស​កំណើត​ជាង​សហរដ្ឋអាមេរិក​។ ការយល់ច្រឡំ​ដ៏​គួរ​ឲ្យ​សោកស្ដាយ និង​ទៀត​ទាត់​ទាំងនេះ បំផ្លាញ​អារម្មណ៍​នៃ​ភាពជា​ម្ចាស់ និង​សុវត្ថិភាព​របស់​យើង​ជា​ពលរដ្ឋ​អាមេរិក​ដើមកំណើត​អាស៊ី និង​អ្នក​កោះ​ប៉ាស៊ីហ្វិក ឬ AAPIs»​។​

​ការស្ទង់មតិ​របស់ Asian American Foundation បាន​ប្រមូល​ចម្លើយ​ពី​អ្នកឆ្លើយ​សំណួរ​ចំនួន ៥.២៣៥​នាក់ នៅ​សហរដ្ឋអាមេរិក ដែល​ពួកគេ​ទាំងអស់​មាន​អាយុ​លើសពី ១៦​ឆ្នាំ​។ ក្រុម​នេះ​បានចាប់ផ្តើម​សួរនាំ​ពាក់ព័ន្ធ​នឹង​អារម្មណ៍​នេះ​ជាមួយនឹង​ការស្ទង់មតិ ក្នុង​ឆ្នាំ​២០២១ បន្ទាប់ពី​ទំនោរ​នៃ​ការកើនឡើង​អំពើហិង្សា​ប្រឆាំងនឹង​ជនជាតិ​អាមេរិក​ដើមកំណើត​អាស៊ី និង​ប្រជាជន​កោះ​ប៉ាស៊ីហ្វិក​។ នៅពេលនោះ ការស្ទង់មតិ​បានក្លាយ​ជា​ខ្នាត​រង្វាស់​ជាតិ​ដ៏​ធំ​បំផុត​មួយ​នៃ​ការយល់ឃើញ​របស់​ជន​ជាតិ​អាមេរិក​ដើមកំណើត​អាស៊ី​៕​