​បណ្ដា​មេដឹកនាំ​សហភាព​អឺរ៉ុប​មកពី​ក្រុម​ប្រទេស​ទាំង​ប្រាំពីរ (G7) បាន​បើក​កិច្ចពិភាក្សា​តុមូល​នៅ​ថ្ងៃ​សុក្រ (១៩ ឧសភា​)​នេះ នៅ​ខាងក្រៅ​កិច្ចប្រជុំ​កំពូល​នៅ​ទីក្រុង​ហ៊ី​រ៉ូ​ស៊ី​ម៉ា​។​

​កិច្ចពិភាក្សា​តុមូល​នោះ រួមមាន​ប្រធាន​គណៈកម្មការ​អឺរ៉ុប​លោកស្រី Ursula von der Leyen អធិការបតី​អាល្លឺម៉ង់​លោក Olaf Scholz ប្រធានាធិបតី​បារាំង​លោក Emmanuel Macron ប្រធាន​ក្រុមប្រឹក្សា​អឺរ៉ុប​លោក Charles Michel និង​នាយករដ្ឋមន្ត្រី​អ៊ីតាលី​លោកស្រី Giorgia Meloni ។ ពួកគេ​នឹង​ត្រូវបាន​ចូលរួម​ដោយ​សម​ភាគី​របស់ខ្លួន​មកពី​សហរដ្ឋអាមេរិក អង់គ្លេស និង​កាណាដា សម្រាប់​កិច្ចប្រជុំ​មេដឹកនាំ​ក្រុម​ប្រទេស​ទាំង​៧ (G7) នេះ ។​

​ប្រភពពី​សហភាព​អឺរ៉ុប​បាន​និយាយថា ប្រធានាធិបតី​អ៊ុយ​ក្រែ​ន​លោក Volodymyr Zelenskiy នឹងធ្វើ​ដំណើរ​ទៅកាន់​ប្រទេស​ជប៉ុន ដើម្បី​ចូលរួម​ជាមួយ​បណ្ដា​មេដឹកនាំ​នៃ​ប្រទេស​ប្រជាធិបតេយ្យ​ជឿនលឿន​បំផុត​របស់​ពិភពលោក​នៅក្នុង​កិច្ចប្រជុំ​កំពូល​នៅ​ទីក្រុង​ហ៊ី​រ៉ូ​ស៊ី​ម៉ា​របស់​ពួកគេ​។​

​មេដឹកនាំ​ក្រុម​ប្រទេស​ទាំង​៧ (G7) ត្រូវបាន​គេ​រំពឹងថា​នឹង​ប្រកាស​ពី​ការដាក់ទណ្ឌកម្ម​កាន់តែ​តឹងរ៉ឹង​លើ​ប្រទេស​រុស្ស៊ី និង​ពិភាក្សា​យុទ្ធសាស្ត្រ​លើ​ជម្លោះ​មាន​រយៈពេល​ជាង​មួយ​ឆ្នាំនេះ ដែល​ពុំមាន​សញ្ញា​នៃ​ភាព​ធូរស្រាល​ក្នុងអំឡុងពេល​កិច្ចប្រជុំ​កំពូល​រយៈពេល​បី​ថ្ងៃនេះ​៕​