​ដោយ​ត្រូវបាន​បិទ​អស់​រយៈពេល ៣ ឆ្នាំ សណ្ឋាគារ​ដ៏​ល្បី​មួយ​នៅ​ទីក្រុង​ញូវយ៉ក​កំពុង​ត្រូវបាន​គេ​រៀបចំ​ឡើងវិញ​ជា​មជ្ឈមណ្ឌល​រៀបចំ​បែបបទ​សម្រាប់​ជនអន្តោប្រវេសន៍​។ សណ្ឋាគារ Roosevelt មាន​ទីតាំងនៅ​កណ្តាល​តំបន់​ពាណិជ្ជកម្ម Manhattan ដែល​ស្ថិតនៅ​មិន​ឆ្ងាយ​ប៉ុន្មាន​ពី​ស្ថានីយ​រថភ្លើង Grand Central Terminal ។​

​សណ្ឋាគារ​នេះ​អាច​ផ្ទុក​អ្នកស្រុក​អតិបរិមា​បាន​ប្រហែល ៩០០​នាក់​។ ឥឡូវនេះ​វា​កំពុងដំណើរការ​ជា '​មជ្ឈមណ្ឌល​សម្រាប់​អ្នកស្វែងរក​សិទ្ធិ​ជ្រកកោន​' ខណៈដែល​ទីក្រុង​ញូវយ៉ក​កំពុង​តស៊ូ​ដើម្បី​ដោះស្រាយ​បញ្ហា​លំហូរ​ជនអន្តោប្រវេសន៍​ទៅកាន់​ទីក្រុង​។​

​ការ​ខំ​ស្វះ​ស្វែងរក​លំនៅឋាន​នៅ​ទូទាំង​សហរដ្ឋអាមេរិក​ធ្វើឡើង​បន្ទាប់ពី​កាលពី​សប្តាហ៍ ដែល​បានបញ្ចប់​វិធាន​រឹតបន្តឹង​ព្រំដែន​ដោយសារ​បញ្ហា​ជម្ងឺ​កូ​វីដ​១៩ ត្រូវបាន​គេ​ស្គាល់​ថា​ជា​ច្បាប់​មាត្រា​ទី​៤២ ដែល​អនុញ្ញាតឱ្យ​ក្រុម​អាជ្ញាធរ​សហរដ្ឋអាមេរិក បណ្តេញ​ជនអន្តោប្រវេសន៍​ទៅ​ប្រទេស​ម៉ិ​ក​ស៊ិ​ក ដោយ​មិន​មានឱកាស​ស្វែងរក​សិទ្ធិ​ជ្រកកោន​ក្នុង​សហរដ្ឋអាមេរិក​ទេ​។

​មនុស្ស​រាប់ម៉ឺន​នាក់​បាន​ប្រញាប់ប្រញាល់​ឆ្លងកាត់​ព្រំដែន​ដោយ​ខុសច្បាប់ មុនពេល​ប្រធានាធិបតី​សហរដ្ឋអាមេរិក​លោក Joe Biden អនុវត្ត​វិធានការ​ផ្តល់​សិទ្ធិ​ជ្រកកោន​ថ្មី​ដ៏​តឹងរឹង​ដើម្បី​ជំនួស​ច្បាប់​មាត្រា​ទី ៤២ ។​

​អភិបាលក្រុង​ញូវយ៉ក​លោក Eric Adams បាន​អំពាវនាវ​ឱ្យ​រដ្ឋបាល​របស់លោក Biden ផ្តល់​មូលនិធិ​បន្ថែមទៀត​ដល់ទី​ក្រុង​នានា​។ លោក Adams បាន​ផ្អាក​ច្បាប់​សិទ្ធិ​ជ្រកកោន​មួយចំនួន​របស់​ទីក្រុង​ញូវយ៉ក​កាលពី​សប្តាហ៍​មុន ដោយ​លើកឡើង​ពី​បញ្ហាលំបាក​នៃ​ការផ្តល់​ទីស្នាក់អាស្រ័យ​ដល់​អ្នកស្វែងរក​សិទ្ធិ​ជ្រកកោន ហើយ​កំពុង​ពិចារណា​ប្រើប្រាស់​គ្រឹះស្ថាន​ហាត់ប្រាណ​នៅ​សាលារៀន​ធ្វើជា​ជម្រក​បណ្ដោះអាសន្ន​សម្រាប់​ពួកគេ​៕​