ព្រៃវែង ៖ ទីភ្នាក់ងារសហប្រតិបត្តិការកម្ពុជាកូរ៉េ(កយកា-KOICA) រួមជាមួយសមាគមអតីតកម្មសិក្សាការីកម្ពុជា-កូរ៉េ (កាំកា-CAMKAA) និងក្រុមហ៊ុនHesed ក្រុមហ៊ុន ហ៊ីយ៉ាន់ដាយ, ធនាគារស៊ីនហាន, ក្រុមហ៊ុនវែរីវើដស និង ធនាគារអ៊ូរី បានរៀបចំពិធីចែកអំណោយមនុស្សធម៌នៅខេត្តព្រៃវែង, នាព្រឹកថ្ងៃទី១៩ ខែឧសភា ឆ្នាំ២០២៣នេះ។

​សម្ភារៈដែលត្រូវចែកជូនដល់សិស្សានុសិស្សរួមមាន៖ កង់ ចំនួន១៥០គ្រឿង មួកសុវត្ថិភាព ចំនួន៣០០ ឯកសណ្ឋានសិស្ស ចំនួន១៥០កំប្លេ សៀវភៅសរសេរ ចំនួន១០០០ក្បាល ប៊ិក ចំនួន២០០ឈុត ស្ករត្នោត ចំនួន៣០០ថង់ ​និងថ្នាំពេទ្យ។ កម្មវិធីចែកអំណោយនេះត្រូវបានធ្វើឡើងដោយសារការចូលរួម និងការរួម​ចំណែកពី​ក្រុមហ៊ុនកូរ៉េ ដែលរស់នៅក្នុង​ប្រទេសកម្ពុជា ដូចជា៖ ក្រុមហ៊ុនHesed ក្រុមហ៊ុនហ៊ីយ៉ាន់​ដាយ ​ធនាគារស៊ីនហាន​ ក្រុមហ៊ុនវែរីវើដស៍និង ធនាគារអ៊ូរី។ បន្ទាប់ពីពិធីចែកអំណោយ ក្រុមវេជ្ជបណ្ឌិតរបស់ កយកា-KOICA ដោយមាន​ជំនួយពីក្រុមសុខសប្បាយ ដែលមានសមាសភាព​មកពីអ្នកស្ម័គ្រចិត្ត កយកា និងសមាជិកកាំកា បានផ្តល់សេវា​ពិគ្រោះ និងព្យាបាលជំងឺជូនអ្នកជំងឺប្រមាណ ៣០០នាក់ នៅអនុវិទ្យាល័យតាកោ ផងដែរ។ លើសពីនេះ ក្រុមសុខសប្បាយ រួមជាមួយលោកគ្រូ អ្នកគ្រូ នៅខេត្តព្រៃវែង បានផ្តល់ការ​អប់រំសុខភាពមួយចំនួន ស្តីពីសុខភាព និងអនាម័យ ដល់សិស្សានុសិស្ស ដើម្បីរក្សាបាននូវទម្លាប់អនាម័យល្អ​ទម្លាប់ទាំងនេះអាចជួយ​ការពារការរាលដាល​នៃជំងឺ និងរក្សាសុខភាពបុគ្គល។

ឯកឧត្តម អ៊ឹម សួរ ប្រធានសមាគមអតីតកម្មសិក្សាការី (កាំកា) បានមានប្រសាសន៍ថា គោលបំណងចម្បងនៃ​ការចែកអំណោយ​ថ្ងៃនេះគឺចូលរួមចែករំលែកការលំបាករបស់មាតា បិតាសិស្ស ជាពិសេសលើកទឹក​ចិត្តឱ្យក្មួយៗសិស្សានុសិស្ស​ឱ្យខិតខំព្យាយាម​តស៊ូរៀនសូត្រមានចំណេះដឹងភ្លឺស្វាង និងមានសមត្ថភាពគ្រប់គ្រាន់ ដើម្បីចូលរួមអភិវឌ្ឍន៍សង្គម-សេដ្ឋកិច្ចកម្ពុជា។

លោកជំទាវ ហ៊ន សុធារី អភិបាលរងខេត្តព្រៃវែង បានថ្លែងអំណរគុណចំពោះ កយកា និងអ្នកចូលរួមទាំង​អស់ដែលបានរៀបចំ​ពិធីចែកអំណោយសកម្មភាពសង្គមក្នុងខេត្តព្រៃវែង។ លោកជំទាវ ទន្ទឹងរង់ចាំធ្វើការជាមួយ កយកា ជាលើកទី២ និងលើកទី៣ នៃពិធីចែកអំណោយសកម្មភាពសង្គម" នាពេលខាងមុខជាបន្តបន្ទាប់ទៀត។ ដើម្បីជាការតបស្នងចំពោះទឹកចិត្តដ៏ប្រពៃថ្លៃថ្លាបំផុតរបស់ម្ចាស់អំណោយ ក៏ដូចជាអ្នកផ្តួចផ្តើម ឱ្យមានពិធីនេះឡើង លោកជំទាវ ក៏សូមសំណូមពរដល់ក្មួយៗ សិស្សានុសិស្សទាំងអស់ សូមខិតខំប្រឹងប្រែងរៀន សូត្រឱ្យបានពូកែគ្រប់ៗគ្នា ដើម្បីក្លាយជាទំពាំងស្នងឫស្សី និងជាធនធានមនុស្សដ៏មានតម្លៃសម្រាប់ ប្រទេសជាតិ នាពេលអនាគត។នាឱកាសនោះ លោក នោ ហ្យន់ជូន (Rho Hyunjun) ប្រធានតំណាងទីភ្នាក់ងារសហប្រតិបត្តិការ​អន្តរជាតិកូរ៉េ(កយកា-KOICA)ប្រចំាប្រទេសកម្ពុជា មានប្រសាសន៍ថា គំនិតផ្តួចផ្តើមនេះគឺផ្អែកលើភាពជាដៃគូ និងកិច្ចសហប្រតិបត្តិការដ៏រឹងមាំក្នុងចំណោម កយកា-កាំកា និងវិស័យឯកជន កម្មវិធីនេះអាចប្រព្រឹត្តទៅ​បានតែដោយសារការរួមចំណែក​ដ៏សប្បុរសពីសំណាក់ក្រុមហ៊ុនកូរ៉េដែលបានចូលរួមក្នុងព្រឹត្តិការណ៍នេះ ខណៈដែលការិយាល័យកយកា-KOICAប្រចាំប្រទេសកម្ពុជា ទើបតែជួយរៀបចំ ដើម្បីនាំមកនូវកិច្ចខិតខំ​ប្រឹងប្រែងរួមគ្នារបស់តួអង្គពាក់ព័ន្ឋ។

កយកា-KOICA នឹងបន្តគាំទ្ររដ្ឋាភិបាល និងប្រជាជនកម្ពុជា ដើម្បីធ្វើឲ្យប្រទេសនេះកាន់តែមានសោភ័ណភាព និងកន្លែងរស់នៅកាន់តែប្រសើរឡើង។លោកសង្ឃឹមយ៉ាងមុតមាំថា កម្មវិធីថ្ងៃនេះនឹងនាំយើងឲ្យខិត​ទៅជិតអនាគតដែលយើងប្រាថ្នាចង់បាន៕ ដោយ ៖ រដ្ឋា