ភ្នំពេញ៖ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានសម្ពោធដាក់ឲ្យប្រើប្រាស់ នូវរបាយការណ៍វាយតម្លៃតម្រូវការបច្ចេកវិទ្យា សម្រាប់ព្រះរាជាណាចក្រម្ពុជា ខណៈ របាការណ៍នេះ ត្រូវបានចាត់ទុកជាគំរូមួយ សម្រាប់វិធីសាស្ត្រក្នុងការដឹកនាំប្រទេស ។

ក្នុងពិធីសម្ពោធដាក់ឲ្យប្រើប្រាស់នូវរបាយការណ៍នេះ នាថ្ងៃទី១៩ ខែឧសភា ឆ្នាំ២០២៣ ឯកឧត្តមសាស្ត្រាចារ្យបណ្ឌិត ឆែម គាតរិទ្ធី រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិ ការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកឡើងថា របាយការណ៍វាយតម្លៃតម្រូវការបច្ចេកវិទ្យា ស្របតាមគោលនយោបាយ និងយុទ្ធសាស្ត្រ វិទ្យាសាស្ត្រ បច្ចេកវិទ្យា នវានុវត្តន៍ របស់កម្ពុជា ដែលលើកកម្ពស់ការអភិវឌ្ឍប្រកបដោយចីរភាព និងបរិយាប័ន្ន ។

ឯកឧត្តមបានបន្តថា រាជរដ្ឋាភិបាលបានកំណត់យកវិទ្យាសាស្ត្រ បច្ចេកវិទ្យា នវានុវត្តន៍ជាឧបករណ៍អាទិភាពដ៏សំខាន់ ក្នុងការប្រែក្លាយសេដ្ឋកិច្ច ទៅជាប្រទេសដែលមាន​ចំណូលមធ្យមកម្រិត​ខ្ពស់នៅឆ្នាំ២០៣០ និងជាប្រទេសដែលមានចំណូលខ្ពស់នៅឆ្នាំ២០៥០ ។

ឯកឧត្តម បានថ្លែងអំណរគុណ ចំពោះដៃគូអភិវឌ្ឍន៍ទាំងអស់ ជាពិសេសធនាគារបច្ចេកវិទ្យា នៃអង្គការសហប្រជាជាតិ សម្រាប់ប្រទេសអភិវឌ្ឍន៍តិចតួច (UNTB-LDC) បានគាំទ្រផលិតរបាយការណ៍នេះ និងជំរុញទៅភាគីពាក់ព័ន្ធទាំងអស់ រួមទាំងក្រសួង គ្រឹះស្ថានអប់រំ វិស័យឯកជន និងដៃគូអភិវឌ្ឍន៍ប្រើប្រាស់របាយការណ៍នេះ ជាធនធានដ៏សំខាន់ ។

លោកបណ្ឌិត Taffere Tesfachew នាយកគ្រប់គ្រងស្តីទី នៃធនាគារបច្ចេកវិទ្យា នៃអង្គការសហប្រជាជាតិ លើកឡើងថា របាយការណ៍នេះ ត្រូវបានចាត់ទុកជាគំរូមួយ សម្រាប់វិធីសាស្ត្រ ក្នុងការដឹកនាំប្រទេស និងឆ្លើយតបទៅនឹងតម្រូវការ និងជាឯកសារអន្តរាគមន៍ទាន់ពេលវេលាមួយ ស្របតាមផែនទីបង្ហាញផ្លូវ វិទ្យាសាស្ត្រ បច្ចេកវិទ្យា នវានុវត្តន៍ កម្ពុជានៅឆ្នាំ២០៣០ ដែលរួមបញ្ចូលទាំងការយកចិត្តទុកដាក់ទៅលើសមត្ថភាព នៃការអភិវឌ្ឍ វិទ្យាសាស្ត្រ បច្ចេកវិទ្យា នវានុវត្តន៍ ។

យោងតាមការពិគ្រោះយោបល់ជាមួយអ្នកអនុវត្ត និងអ្នកជំនាញក្នុងវិស័យផ្សេងៗ ក្នុងប្រទេសកម្ពុជា របាយការណ៍នេះ បានកំណត់នូវសំណុំនៃបច្ចេកវិទ្យាអទិភាព ដែលត្រូវបានណែនាំ​សម្រាប់ផ្ទេរមកកម្ពុជា ។ បច្ចេកវិទ្យាដែលត្រូវបានកំណត់មានភាពពាក់ព័ន្ធ និងសមស្របក្នុងការដោះស្រាយនូវតម្រូវការ នៃវិស័យអទិភាពសម្រាប់មហិច្ឆតាអភិវឌ្ឍ របស់កម្ពុជា ដូចជា ថាមពល កសិកម្ម ការអប់រំ សុខាភិបាល ការអភិរក្ស និងបរិស្ថាន ៕ អត្ថបទ ៖ បាន សុខរិទ្ធិ