ភ្នំពេញ ៖ ស្ថានទូតបារាំងប្រចាំនៅកម្ពុជា នៅល្ងាចថ្ងៃទី១៩ ខែឧសភា ឆ្នាំ២០២៣នេះ បានរៀបចំ​ពិធីជួបជុំអតីត និស្សិតខ្មែរដែលបានទៅសិក្សានៅប្រទេសបារាំង ឬទទួលបាន​សញ្ញាប័ត្រ​ពីគ្រឹះស្ថាន​ឧត្តមសិក្សាបារាំងជាងបួនរយនាក់ ខណៈការរៀបចំកម្មវិធីនេះឡើងក្នុងក្របខណ្ឌនៃទិវា France Alumni លើកទី១ ដែលផ្តួចផ្តើមគំនិតដោយលោកស្រី កាតឺរីន កូឡូណា រដ្ឋមន្ត្រីក្រសួងអឺរ៉ុប និងការបរទេសបារាំង។

កម្មវិធីជួបជុំដែលរៀបចំនៅស្ថានទូតបារាំងនៅពេលនេះ ទទួលបានការអញ្ជើញ​ចូលរួមពីភ្ញៀវ​កិត្តិយសប្រមាណ៤៥០នាក់ ក្នុងនោះមានឥស្សរជនជាន់ខ្ពស់ជាច្រើន រួមទាំងរដ្ឋមន្ត្រីផងដែរ ដែល​សុទ្ធសឹង​ជាអតីតនិស្សិតដែលធ្លាប់បានសិក្សានៅប្រទេសបារាំង ឬទទួលសញ្ញាប័ត្រ​ពីគ្រឹះ​ស្ថានឧត្តម​សិក្សាបារាំង។ ហើយកម្មវិធីនេះ ក៏ជាឱកាសដើម្បីអបអរនិស្សិតកម្ពុជា៣១២នាក់ ដែលទទួលបានសញ្ញាប័ត្របារាំងកាលពីឆ្នាំ២០២២បន្ទាប់ពីបានសិក្សានៅប្រទេសបារាំង ឬនៅ​តាមថ្នាក់​ពិសេសនៃគ្រឹះស្ថានសិក្សាប្រើប្រាស់ភាសាបារាំងនៅកម្ពុជាផងដែរ។

ថ្លែងនៅក្នុងកម្មវិធីនោះ លោក ហ្សាក់ ប៉ឺឡេ ឯកអគ្គរដ្ឋទូតបារាំងប្រចាំកម្ពុជា បានរំលឹកអំពី​ភាពរស់រវើកនៃកិច្ចសហប្រតិបត្តិការរវាងសាកលវិទ្យាល័យនៃប្រទេសបារាំង និងប្រទេសកម្ពុជា។ បន្ថែមលើកិច្ចសហប្រតិបត្តិការវិទ្យាសាស្រ្តជាច្រើនរវាងវិទ្យាស្ថានស្រាវជ្រាវសម្រាប់ការអភិវឌ្ឍ(IRD) មជ្ឈមណ្ឌល CIRAD និងសកលវិទ្យាល័យនានារបស់កម្ពុជា បច្ចុប្បន្ននៅប្រទេសកម្ពុជា និស្សិត​អាចទទួលបានសញ្ញាប័ត្រពីគ្រឹះស្ថានឧត្តមសិក្សាបារាំងនៅលើជំនាញជា​ច្រើនតាមរយៈការបណ្តុះបណ្តាល់ជាភាសាបារាំងនៅ​តាមសាកលវិទ្យាល័យ​កម្ពុជាចំនួន៤ គឺសាកលវិទ្យាល័យ​ភូមិន្ទ​នីតិសាស្រ្ត ​និងវិទ្យាសាស្រ្តសេដ្ឋកិច្ច សាកលវិទ្យាល័យភូមិន្ទវិចិត្រសិល្បៈ វិទ្យាស្ថានបច្ចេក​វិទ្យា​កម្ពុជា និងសាកលវិទ្យាល័យវិទ្យាសាស្រ្តសុខាភិបាល។

លោកឯកអគ្គរដ្ឋទូតបានបន្តទៀតថា គ្រូពេទ្យកម្ពុជាជាច្រើនរូប​ដែលបានបំពេញកម្មសិក្សា​នៅតាម​មន្ទីរពេទ្យបារាំង និងនិស្សិតអាហារូបករណ៍រដ្ឋាភិបាលបារាំង និងនិស្សិតអាហារូបករណ៍​សហហិរញ្ញប្បទានផ្តល់ដោយគ្រឹះស្ថានសិក្សាកម្ពុជា ក៏មានវត្តមានក្នុងឱកាសខាងលើផងដែរ។ លោកឯកអគ្គរដ្ឋទូតបារាំងបានស្វាគមន៍និស្សិតទាំងនេះឱ្យចូលរួមក្នុងបណ្តាញអតីតនិស្សិតកម្ពុជាមកពីបារាំង (France Alumni Cambodge) និងបានថ្លែងអំណរគុណដៃ​គូកម្ពុជាចំពោះ​ទំនាក់ទំនងទ្វេភាគី​ប្រកប​ដោយគុណភាព៕ អត្ថបទ ៖ បាន ចក់