ទីក្រុងវ៉ាទីកង់បាននិយាយថា បុរសម្នាក់បើករថយន្តបំពានសន្តិសុខរបស់វ៉ាទីកង់កាលពីល្ងាចថ្ងៃព្រហស្បតិ៍ (១៨ ឧសភា) ដោយបើកបរក្នុងល្បឿនលឿនកាត់ច្រកទ្វារនៃទីក្រុងដែលចាត់ទុកជារដ្ឋមួយនេះ ហើយបើកទៅដល់ទីធ្លាក់ណ្តាលនៃវិមាន Apostolic មុនពេលត្រូវបានចាប់ខ្លួន។

សេចក្តីថ្លែងការណ៍មួយបាននិយាយថា នគរបាលវ៉ាទីកង់ម្នាក់បានបាញ់កាំភ្លើងហើយបានបុករថយន្តនោះ។ បុរសដែលជាជនសង្ស័យមានវ័យប្រហែល៤០ឆ្នាំ ហើយស្ថិតក្នុងស្ថានភាពផ្លូវចិត្តមិនប្រក្រតីនោះ មិនបានចូលទៅជិតផ្ទះសំណាក់នៅផ្នែកម្ខាងទៀតនៃវិមានវ៉ាទីកង់ ដែលសម្តេចប៉ាប ហ្វ្រង់ស៊ីស គង់នៅនោះទេ។

សេចក្តីថ្លែងការណ៍បាននិយាយថា ហេតុការណ៍នេះបានកើតឡើងនៅម៉ោងប្រហែល ៨ យប់ ពេលដែលបុរសនោះបានបើករថយន្តឆ្លងកាត់ច្រកទ្វារ Saint Ann ដែលជាច្រកចូលមួយក្នុងចំណោមច្រកចូលជាច្រើនដែលបំបែករដ្ឋអធិបតេយ្យភាពទំហំ ១០៨ ហិចតានេះពីទីក្រុងរ៉ូម។

ដំបូងឡើយ បុរសនោះបានព្យាយាមចូលទៅក្នុងវិមានវ៉ាទីកង់ ប៉ុន្តែឆ្មាំល្បាតស្វីសបានបណ្ដេញគេចេញនៅមាត់ច្រកទ្វារ។ បន្ទាប់មក បុរសនោះបានបើករថយន្តដោយបង្កើនល្បឿនយ៉ាងលឿន ហើយបើកកាត់ច្រកទ្វារព្រមទាំងប៉ុស្តិ៍ត្រួតពិនិត្យទីពីរនៅជិតខាងក្រោយវិហារ St. Peter's Basilica ទៀតផង។

នគរបាលម្នាក់បានបាញ់កាំភ្លើងមួយគ្រាប់ ហើយបានបុករបាំងខាងមុខរបស់រថយន្ត ប៉ុន្តែបុរសនោះបន្ថែមល្បឿនទៅមុខ ហើយបានទៅដល់ទីធ្លា San Damaso ដែលជាផ្នែកនៃវិមាន Apostolic ជាទីដែលសម្តេចប៉ាបពីមុនគង់នៅ និងជាទីដែលសម្តេចប៉ាប ហ្វ្រង់ស៊ីស នៅតែជួបប្រជុំផ្លូវការ។

ជនសង្ស័យត្រូវបានចាប់ខ្លួននៅទីធ្លា ហើយដាក់ក្នុងគុកតូចមួយរបស់វិមានវ៉ាទីកង់ ជាទីដែលលោកត្រូវបានពិនិត្យដោយក្រុមវេជ្ជបណ្ឌិតរបស់ទីក្រុងវ៉ាទីកង់៕