សកម្មជនជប៉ុនមួយក្រុមបានដើរដង្ហែរតាមផ្លូវក្នុងទីក្រុងហ៊ីរ៉ូស៊ីម៉ាភាគខាងលិចប្រទេសជប៉ុននៅថ្ងៃសុក្រ (១៩ ឧសភា)នេះ ដើម្បីតវ៉ាប្រឆាំងនឹងកិច្ចប្រជុំកំពូលរបស់មេដឹកនាំក្រុមប្រទេសទាំង៧ (G7) និងសង្គ្រាមនុយក្លេអ៊ែរ។

នគរបាលបានបំបែកក្រុមបាតុករដោយប្រើឧបករណ៍បង្ក្រាបកុបកម្ម ហើយក្រុមនោះបានដើរដង្ហែរតាមដងផ្លូវធំមួយនៅកណ្តាលទីក្រុងហ៊ីរ៉ូស៊ីម៉ា ដែលនៅមិនឆ្ងាយប៉ុន្មានពីឧទ្យានអនុស្សាវរីយ៍សន្តិភាព ជាទីដែលព្រឹត្តិការណ៍កិច្ចប្រជុំកំពូល G7 ជាច្រើនកំពុងត្រូវបានធ្វើឡើង។

ក្រុមបាតុករបាននិយាយថា ការផ្ទុះកំហឹងរបស់ពួកគេបានបង្កឡើងដោយកិច្ចប្រជុំរបស់បណ្ដាមេដឹកនាំនៃមហាអំណាចនុយក្លេអ៊ែរជាច្រើន រួមទាំងសហរដ្ឋអាមេរិក នៅក្នុងទីក្រុងដែលត្រូវបានបំផ្លិចបំផ្លាញដោយការទម្លាក់គ្រាប់បែកបរមាណូលើកដំបូងរបស់ពិភពលោកក្នុងឆ្នាំ ១៩៤៥។ ក្រុមបាតុករក៏បានចោទប្រកាន់សមាជិកមួយចំនួននៃក្រុមប្រទេសទាំង៧ថា បានបង្កភាពតានតឹងក្នុងតំបន់ជាមួយចិន ដែលជាប្រទេសជិតខាងរបស់ជប៉ុន។

កិច្ចប្រជុំកំពូល G7 ចាប់ផ្តើមពីថ្ងៃសុក្រដល់ថ្ងៃអាទិត្យ (១៩ ដល់ ២១ ឧសភា) ដែលក្នុងនោះបណ្ដាមេដឹកនាំប្រទេសជាសមាជិកត្រូវបានគេរំពឹងថានឹងពិភាក្សាអំពីការរឹតបន្តឹងដែលអាចកើតមានលើរុស្ស៊ី ព្រមទាំងកង្វល់សន្តិសុខពីប្រទេសចិន ក្នុងចំណោមបញ្ហាផ្សេងៗទៀត៕