ក្រុមអ្នកតវ៉ា និងនគរបាល បានប៉ះទង្គិចគ្នានៅជិតទីស្នាក់ការគណបក្សកំពុងកាន់អំណាចរបស់ប្រទេសហុងគ្រីកាលពីថ្ងៃសុក្រអំឡុងការតវ៉ាប្រឆាំងច្បាប់ថ្មីដែលនឹងលុបបំបាត់ឋានៈមន្ត្រីរដ្ឋការសាធារណៈរបស់គ្រូបង្រៀន។

ក្រុមអ្នកតវ៉ា និងមន្ត្រីនគរបាលពាក់អាវក្រោះ បានរុញគ្នា នៅដងផ្លូវដ៏ចង្អៀត។ ក្រុមអ្នកតវ៉ាបានស្រែកថា «អ្នកកំពុងការពារឧក្រិដ្ឋជន» និង«ជនក្បត់ជាតិ»។

កាលពីថ្ងៃសុក្រក្រុមអ្នកតវ៉ា បានដើរធ្វើបាតុកម្មប្រឆាំងនូវអ្វីដែលគេហៅថាច្បាប់ថ្មី ដែលនឹងបង្កើនយ៉ាងច្រើននូវបន្ទុកការងាររបស់គ្រូបង្រៀនដែលរដ្ឋាភិបាលនិយាយថា មានបំណងធ្វើឲ្យប្រសើរឡើងគុណភាពអប់រំ។

ក្រុមអ្នករិះគន់ បាននិយាយយោងទៅរកច្បាប់នេះថាជា«ច្បាប់សងសឹក» ដែលត្រូវបានដឹងថាជាការដាក់ទណ្ឌកម្មសម្រាប់ការប្រឆាំងជាយូរឆ្នាំមកហើយរបស់គ្រូបង្រៀន ហើយគ្រូបង្រៀនជិត៥ពាន់នាក់ បាននិយាយថា ពួកគេនឹងចាកចេញពីវិជ្ជាជីវៈរបស់ពួកគេប្រសិនបើច្បាប់នេះចូលជាធរមាន។

ក្រុមអ្នកតវ៉ាបានធ្វើបាតុកម្មប្រឆំាងនឹងយុទ្ធនាការរបស់នគរបាលនៅក្នុងការតវ៉ាមួយកាលពីដើមខែ ឧសភា នៅពេលក្រុមអ្នកតវ៉ាជាច្រើនត្រូវបានគេបាញ់ឧស្ម័នបង្ហៀរទឹកភ្នែកដាក់ និងត្រូវបាននគរបាលឃុំខ្លួន ទោះបីជាក្រោយមកពួកគេត្រូវបានដោះលែងដោយគ្មានបទចោទប្រកាន់ក៏ដោយ។