​

មនុស្សរាប់ម៉ឺននាក់ បានធ្វើបាតុកម្មនៅទូទាំងទីក្រុងប៊ែលហ្គ្រាដ ប្រទេសស៊ែរប៊ី កាលពីថ្ងៃសុក្រ ជាការតវ៉ាប្រឆំាងរដ្ឋាភិបាលក្នុងការឆ្លើយតបទៅនឹងការបាញ់ប្រហារទ្រង់ទ្រាយធំចំនួន២លើក ដែលបានបណ្តាលឲ្យមនុស្ស១៨នាក់ស្លាប់ ដែលបានដាក់កំហុសការស្លាប់លើវប្បធម៌នៃអំពើហិង្សា ដែលក្រុមអ្នករិះគន់និយាយថា អាជ្ញាធរបានអនុញ្ញាតពុំមានការត្រួតពិនិត្យ។ 

កាលពីថ្ងៃទី៣ ខែឧសភា ក្មេងប្រុសជំទង់ម្នាក់ បានសម្លាប់កូនសិស្ស៩នាក់ និងឆ្មាំសន្តិសុខម្នាក់ ក្នុងការបាញ់ប្រហារទ្រង់ទ្រាយធំមួយនៅសាលារៀនជាលើកដំបូងក្នុងប្រទេសស៊ែរប៊ី ហើយមួយថ្ងៃក្រោយមកបុរសអាយុ២១ឆ្នាំម្នាក់ បានសម្លាប់មនុស្ស៨នាក់ នៅខាងក្រៅទីក្រុងប៊ែលហ្គ្រាដ។

គណបក្សប្រឆាំង ដែលបានរៀបចំបាតុកម្ម និយាយថារដ្ឋាភិបាលដឹកនាំដោយប្រធានាធិបតីលោក Aleksandar Vucic រឹតត្បិតនៅក្នុងប្រព័ន្ធផ្សព្វផ្សាយ ដែលបានជំរុញឲ្យមានអំពើហិង្សានិងសកម្មភាពប្រឆំាងបញ្ហាឧក្រិដ្ឋកម្មនៅក្នុងសង្គម។ ក្រុមអ្នកតវ៉ាបានអំពាវនាវឲ្យលោកប្រធានាធិបតី Vucic រដ្ឋមន្ត្រីក្រសួងមហាផ្ទៃលោកBratislav Gasic និងប្រធានទីភ្នាក់ងារសន្តិសុខប្រទេសស៊ែរប៊ីលាលែងពីតំណែង។

សាស្ត្រាចារ្យសាកលវិទ្យាល័យម្នាក់មានឈ្មោះថា Vera បាននិយាយថា ខ្ញុំមកទីនេះដើម្បីតវ៉ាប្រឆំាងការរស់នៅក្នុងប្រទេសនេះ ជាមធ្យោបាយមួយសម្រាប់ពេលនេះ ដើម្បីតវ៉ាប្រឆំាងអំពើហិង្សា ដែលមើលឃើញគ្រប់ទីកន្លែងនៅក្នុងសុន្ទរកថាសាធារណៈ ប្រព័ន្ធផ្សព្វផ្សាយ ប្រឆំាងភាពអាក្រក់បំផុតដែលយើងកំពុងរស់នៅ និងប្រឆំងទៅនឹងវិធីដែលប្រទេសនេះកំពុងត្រូវបានដឹកនាំ។ ក្រុមអ្នកតវ៉ា បានប្រមូលផ្តុំគ្នានៅខាងក្រៅរដ្ឋសភាប្រទេសស៊ែរប៊ី មុនការដើរក្បួនឆ្លងកាត់រដ្ឋធានី និងដើរទៅលើផ្លូវស្ពានHighway នៅលើទន្លេ Sava ដែលនាំឲ្យការធ្វើចរាចរណ៍ត្រូវផ្អាក។ រដ្ឋាភិបាល បានបដិសេធការចោទប្រកាន់របស់គណបក្សប្រឆាំង និងបានចោទពួកគេពីការរៀបចំការតវ៉ាសម្រាប់ការទទួលបានការចំណេញផ្នែកនយោបាយ។