​កណ្ដាល៖ នៅ​មណ្ឌល​សុខភាព​ពាម​រាំង នា​ព្រឹក​ថ្ងៃ​សៅរ៍ ទី ២០ ខែឧសភា ឆ្នាំ ២០២៣ នេះ លោកជំទាវ ម៉ែន នារី​សោ​ភ័គ និង​សហការី​ នៃ​ក្រុមការងារ​គណបក្ស​ប្រជាជនកម្ពុជា ចុះ​មូលដ្ឋាន​ឃុំពាម​រាំង រួមជាមួយ​ក្រុមគ្រូពេទ្យ​ស្ម័គ្រចិត្ត បាន​អញ្ជើញ​ជួប​សំណេះសំណាល អប់រំ​ផ្សព្វផ្សាយ​ពី​ការថែទាំ​សុខភាព ពិគ្រោះ​យោបល់ ជំងឺ​ទូទៅ ផ្តល់​ថ្នាំ​ព្យាបាល រួមទាំង​ពិនិត្យ​សុខភាព​ភ្នែក ផ្តល់​វែ​នតា​ដោយ​ឥតគិតថ្លៃ ជូន​ប្រជាពលរដ្ឋ​ប្រមាណ ៦៥០​នាក់ រស់នៅ​ឃុំ​ពាម​រាំង ស្រុកលើក​ដែក ខេត្តកណ្តាល​។

​ការចុះពិនិត្យ​សុខភាព​ទូទៅ និង​ពិនិត្យ​ភ្នែក រួមទាំង​ការផ្តល់​ថ្នាំ​ជូន​ពលរដ្ឋ​នេះ ក៏មាន​ការចូលរួម​ផ្តល់​ការឧបត្ថម្ភ​ពី លោកជំទាវ​កិត្តិ​សង្គហ​បណ្ឌិត ឃួន សុ​ដា​រី , ឯកឧត្តម ឃួន ផល្លា​រិ​ទ្ធ និង​ក្រុមការងារ ភូមិ​ព្រែ​កតា​ទួន​និង​ភូមិ​ថ្មី នៃ​ឃុំ​ពាម​រាំង , ឯកឧត្តម គង់ សោភ័ណ និង​ក្រុមគ្រូពេទ្យ​ស្ម័គ្រចិត្ត ឯកឧត្តម កែវ រតនៈ​ផងដែរ​។​

​លោកយាយ​លោកតា និង​បងប្អូន​ប្រជាពលរដ្ឋ​នៅ​ឃុំ​ពាម​រាំង ស្រុក​លើក​ដែក ខេត្តកណ្តាល សប្បាយរីករាយ និង​ថ្លែងអំណរគុណ​ចំពោះ​ក្រុមការងារ​គណបក្ស​ថ្នាក់កណ្តាល​ចុះ​មូលដ្ឋាន​ឃុំ​ពាម​រាំង និង​ក្រុមគ្រូពេទ្យ​ស្ម័គ្រចិត្ត ដែល​បានរៀបចំ​ជា​លើក​ទី​៣ មក​ពិនិត្យ​សុខភាព ពិគ្រោះ​យោបល់ ជំងឺ​ទូទៅ ផ្តល់​ថ្នាំ​ព្យាបាល រួមទាំង​ពិនិត្យ​សុខភាព​ភ្នែក ផ្តល់​វែ​នតា​ដោយ​ឥតគិតថ្លៃ ជូន​ពួកគាត់​នាពេលនេះ​។​

​សូមបញ្ជាក់​ផងដែរ​ថា ថ្ងៃនេះ​គឺជា​លើក​ទី​៣ ហើយដែលក្រុមការងារ​គណបក្ស​ចុះ​មូលដ្ឋាន​ឃុំ​ពាម​រាំង រួមជាមួយ​ក្រុមគ្រូពេទ្យ​ស្ម័គ្រចិត្ត បាន​ចុះ​អប់រំ​សុខភាព និង​ពិនិត្យ​សុខភាព​ជូន​បងប្អូន​ប្រជាពលរដ្ឋ​នៅ​ឃុំ​ពាម​រាំង ។ ក្រុមការងារ​នឹង​បន្ត​ចុះ​ធ្វើសកម្មភាព​នេះ​ជា​បន្តបន្ទាប់ ដែល​អាជ្ញា​មូលដ្ឋាន​នឹង​ជូនដំណឹង​ដល់​ប្រជាពលរដ្ឋ​អំពី​កាលបរិច្ឆេទ​ដែល​បានកំណត់​។​

​នា​ព្រឹក​ថ្ងៃ​ដដែល​នេះ លោកជំទាវ ម៉ែន នារី​សោ​ភ័គ និង​ក្រុមការងារ ក៏បាន​អញ្ជើញ​ជួប​សំណេះសំណាល និង​ប្រគល់​សម្ភារ​សិក្សា​ជូន​សិស្សានុសិស្ស​ចំនួន ២២១​នាក់ នៅ​សាលាបឋមសិក្សា​ពាម​រាំង​លើផងដែរ​៕​