កិច្ចប្រជុំកំពូលក្រុមប្រទេសមានឧស្សាហកម្មលូតលាស់G7 នឹងបិទបញ្ចប់នៅថ្ងៃអាទិត្យនេះ ជា​មួយ​នឹង​ការ​អំពាវនាវសុំជំនួយដោយផ្ទាល់ពីប្រធានាធិបតីអ៊ុយក្រែនលោក Volodymyr Zelensky ដែលបានជំរុញឲ្យក្រុមមេដឹកនាំជួបគ្នានៅទីនេះ ក្នុងប្រទេសជប៉ុន បន្ត​រួបរួ​ម​ប្រឆាំង​នឹង​សកម្មភាពដ៏គគ្លើនរបស់រុស្ស៊ី ។ 

ការសម្រេចចិត្តរបស់លោក Zelensky ក្នុងការធ្វើដំណើរពាក់កណ្តាលផែនដី គឺដើម្បី​ធ្វើការ​អំពាវនាវ​ដោយ​ផ្ទាល់របស់លោកដល់ប្រទេសមហាអំណាចឧស្សាហកម្មធំៗរបស់ពិភពលោក ឲ្យបញ្ជាក់ពីការរួបរួម និងដើម្បីឲ្យក្រុមមេដឹកនាំដែលមានជំហរមិនច្បាស់លាស់ យល់​ដោយ​ខ្លួន​ឯង​ក្នុង​រយៈពេល១៤ខែកន្លងមកនេះ ចាប់​តាំង​ពី​ការ​វាយលុក​របស់​រុស្ស៊ីម​ក​លើ​អ៊ុយក្រែន​ចាប់​ផ្តើម​។ 

ស្របពេលដែលលោក Zelensky ត្រូវបានពង្រឹងដោយអាវុធដ៏ទំនើបពុំធ្លាប់ដែលមានពីមុនមក ដែល​រួមទាំងការសម្រេចចិត្តរបស់ប្រធានាធិបតីសហរដ្ឋអាមេរិកលោក Joe Biden អនុញ្ញាត​ឲ្យ​អាកាស​យានិក​អ៊ុយក្រែនទទួលបានការហ្វឹកហាត់រៀនបើកយន្តហោះចម្បាំង F16នោះ មាន​ក្តី​បារម្ភ​ថា​ ការងារលំបាក និងសម្ពាធនយោបាយ អាចនឹងធ្វើឲ្យការគាំទ្ររបស់លោកខាងលិច កាន់​តែ​រួញ​តូច​ទៅ ។ 

ដោយឡែក ភាពច្របូកច្របល់នៅទីក្រុងវ៉ាស៊ីងតោនកាលពីសប្តាហ៍មុន ដោយសារ​កិច្ច​ចរចា​ជាប់​គាំង​លើ​ការបង្កើនកម្រិតកម្ចីសហព័ន្ធនោះ បានចោទជា​សំណួរ​ផង​ដែរ​នៅ​ក្នុង​ចំណោម​ក្រុម​មេ​ដឹក​នាំ​ប្រ​ទេស G7ថា តើការគាំទ្រនយោបាយដល់អ៊ុយក្រែន អាចទ្រទ្រង់បានយូរប៉ុន្មានទៀត?

អត្ថបទ៖ សារ៉ាត់