នាយករដ្ឋមន្រ្តីកាណាដា លោក Justin Trudeau បាននិយាយប្រាប់ប្រធានាធិបតីអ៊ុយក្រែន លោក Volodymyr Zelenskiy នៅថ្ងៃអាទិត្យនេះថា ក្រុមប្រទេសមានឧស្សាហកម្មលូតលាស់ G7 និងប្រទេសកាណាដា នឹងបន្តឈរយ៉ាងមុតមាំនៅខាងគាំទ្រអ៊ុយក្រែន។ 

លោក Trudeau និងលោក Zelenskiy បានជួបគ្នានៅទីក្រុង Hiroshima ប្រទេសជប៉ុន ជា​ទី​ដែល​ការ​ជួ​បជុំគ្នារបស់មេដឹកនាំក្រុមប្រទេស G7 បានផ្តោតសំខាន់លើការធ្វើឲ្យអន្តរាយដល់រុស្ស៊ី និង​ទប់ចិន ដោយពួកគេបង្ហាញកម្លាំងឈរនៅពីក្រោយមេដឹកនាំអ៊ុយក្រែនម្នាក់នេះ។ 

បណ្តាប្រទេសលោកខាងលិច ប្រើប្រាស់ព្រឹត្តការណ៍នេះ ដើម្បីប្រកាសទណ្ឌកម្មថ្មីលើទីក្រុងម៉ូស្គូ និង​បាន​ប្តេជ្ញាចិត្តផ្តល់អាវុធបន្ថែមទៀត ជំនួយយោធា និងថវិកាធ្វើសង្រ្គាមដល់ទីក្រុងគីវ។ 

ប៉ុន្តែ​ពួក​គេមានគោលដៅវាយប្រហារដោយពាក្យសម្តីធ្ងន់ៗបំផុតលើចិនផងដែរ ដែល​ជា​សម្ព័ន្ធ​ដ៏​មាន​អំណាច​បំផុត​របស់​រុស្ស៊ីនៅអាស៊ី ដោយពួកគេធ្វើការព្រមានប្រធានាធិបតីចិនលោក Xi Jinping ថា រាល់កិច្ចខិតខំធ្វើបាបពួកគេ ឬផ្លាស់​ប្តូរ​ស្ថាន​ភាព​ជាក់​ស្តែង​នៅ​កោះ​ស្វ័យ​គ្រប់​គ្រង​តៃ​វ៉ាន់​ ឬសមុទ្រវិវាទចិនខាងត្បូង នឹងទទួលបានលទ្ធផលតែមួយ ដូចដែលការព្យាយាមរបស់រុស្ស៊ី ក្នុង​ការ​គូព្រំដែនអ៊ុយក្រែនឡើងវិញ៕ អត្ថបទ៖ សារ៉ាត់