កងកម្លាំងសន្តិសុខសាធារណរដ្ឋប្រជាធិបតេយ្យកុងហ្គោ បានបាញ់ឧស្ម័នបង្ហូរទឹកភ្នែក និង​តតាំង​ជាមួយ​ក្រុមបាតុករប្រឆាំងរដ្ឋាភិបាលនៅតាមផ្លូវក្នុងរដ្ឋធានី Kinshasa។ ក្រុមបាតុករទាំងនេះ បាន​តវ៉ាប្រ​ឆាំងនឹងភាពមិនប្រក្រតីនៅការចុះបញ្ជីបោះឆ្នោត។

រូបភាព​វីដេអូ ដែលបានបង្ហោះនៅលើបណ្តាញព័ត៌មានសង្គម ឃើញ​ដង​ផ្លូវ​ពេញ​ណែន​ដោយ​ហ្វូង​មនុស្ស​នៅ​ក្នុងទីក្រុង Kinshasa ស្របពេលដែលកងកម្លាំងសន្តិសុខប្រដាប់ដោយអាវុធ មើល​ក្រុម​បាតុករ​ពី​លើ​រថយន្តរបស់ពួកគេ ។ 

ក្រុមបាតុករទាំងអស់នេះ ខឹងសម្បារផងដែរលើការចំណាយកើនឡើងលើជីវិរភាពរស់នៅ និង​ភាព​អសន្តិសុខដ៏យូរនៅតំបន់ភាគខាងកើតប្រទេស ជាទីដែលក្រុមជីវពលប្រដាប់អាវុធ និង​ក្រុម​ឧទ្ទាម បានសម្លាប់មនុស្សរាប់រយនាក់ និងធ្វើឲ្យមនុស្សជាង ១លាននាក់ ជម្លៀសខ្លួន។ 

ដោយ​ឡែក ក្រុមបាតុកររាប់សិបនាក់ ត្រូវបានឃាត់ខ្លួនដោយកងកម្លាំងសន្តិសុខ ភ្លាមៗ​ក្រោយ​ពេល​ចាប់​ផ្តើម​បាតុកម្ម ដែលអំពាវនាវដោយក្រុមមេដឹកនាំប្រឆាំង ។ 

លោក Sylvano Kasongo គឺជាអ្នកនាំពាក្យនគរបាលក្រុង Kinshasa និយាយប្រាប់​ទីភ្នាក់ងារ​ព័ត៌មាន​រ៉យទ័រ​ថា ក្រុមនគរបាល ៣នាក់ត្រូវបានឃាត់​ខ្លួន​ផង​ដែរ​សម្រាប់​អំពើ​ហិង្សា​លើ​អនីតិជន​ម្នាក់​ អំឡុងបាតុកម្មនោះ។ លោកបន្តថា ក្រុមនគរបាល ២៧នាក់ បាន​រងរបួស​អំឡុង​ការ​ប៉ះទង្គិច​គ្នា​ជា​មួយ​ក្រុមបាតុករ ។ 

សូមបញ្ជាក់ថា កុងហ្គោ គ្រោងនឹងរៀបចំការបោះឆ្នោតសកលនៅថ្ងៃទី ២០ ខែធ្នូខាងមុខនេះ ពេល​ដែល​លោកប្រធានាធិបតី Felix Tshisekedi ត្រូវបានគេរំពឹងថានឹងតាមរកអាណត្តទី ២​របស់​លោក៕ អត្ថបទ៖ សារ៉ាត់