លោក Yevgeny Prigozhin គឺជាមេបញ្ជាការទាហានស៊ីឈ្នូលរុស្ស៊ី Wagnerបាននិយាយថា ក្រុម​អ្នកប្រយុទ្ធរបស់លោក បានដណ្តើមយកទីក្រុង Bakhmut របស់អ៊ុយក្រែន ទាំង​ស្រុង​ហើយ​។ 

លោក Prigozhin បាន​អះអាង​បែប​នេះ​នៅ​ក្នុង​វីដេអូ​ដែល​ឃើញ​លោក​ស្លៀក​ពាក់​ឯក​សណ្ឋាន​ប្រយុទ្ធ​នៅ​មុខ​ខ្សែបន្ទាត់ដែលក្រុមអ្នកប្រយុទ្ធកាន់ទង់ជាតិរុស្ស៊ី និងបដាទាហានស៊ីឈ្នូល Wagner ។ លោកថា នៅថ្ងៃនេះ វេលាម៉ោង ១២ថ្ងៃត្រង់ ទីក្រុង Bakhmut ត្រូវដណ្តើមបានទាំងស្រុង ហើយ។ 

ទោះ​បីជាយ៉ាងណាក៏ដោយ អ៊ុយក្រែន​បាន​ធ្វើ​ការ​ច្រាន​ចោល​ទាំង​ស្រុង​ចំពោះ​អំណះ​អំណាង​មួយ​នេះ ដោយពួកគេនិយាយថា ការប្រយុទ្ធគ្នានៅតែបន្តនៅឡើយ ។ 

លោក Hanna Maliar គឺជាអនុរដ្ឋមន្រ្តីក្រសួងការពារជាតិអ៊ុយក្រែន បានចាត់​ទុក​ស្ថានភាព​នៅ​ទីក្រុង Bakhmut ថាធ្ងន់ធ្ងរ ហើយលោកនិយាយថា ទាហានអ៊ុយក្រែន កំពុង​ការពារ​យ៉ាង​ស្វិត​ស្វាញ​នៅ​តំបន់ភាគនិរតីទីក្រុង ។ 

សូមបញ្ជាក់ថា ទីក្រុង Bakhmut បានក្លាយជា​ចំណុច​ដ៏​ក្តៅគ​គុក​នៃ​សម​រភូមិ​ប្រយុទ្ធ​បង្ហូរ​ឈាម​គ្នាខ្លាំ​ង​បំផុតនៃសង្រ្គាមរបស់រុស្ស៊ីនៅអ៊ុយក្រែន ៕ អត្ថបទ៖ សារ៉ាត់