គម្រោងវិនិយោគនៅក្នុងតំបន់សេដ្ឋកិច្ចពិសេស កំពុងពង្រីក និង​ធ្វើ​ពិពិធកម្ម​ទៅ​លើ​វិស័យ​ឧស្សាហកម្ម​មិន​មែនកាត់ដេរជាច្រើន សម្រាប់បម្រើទីផ្សារនាំចេញ និង​កំពុង​មាន​កំណើន​ប្រកប​ដោយ​ចីរភាព និងភាពធន់នឹងវិបត្តិ ដោយមិនពឹងផ្អែកតែទៅលើវិស័យកាត់ដេរ ផលិតស្បែកជើង និងកាបូបទាំងស្រុង។

ឯកឧត្តម ជា វុទ្ធី អគ្គលេខាធិការរងគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា ថ្លែង​លើក​ឡើង​នៅក្នុង វេទិការអភិវឌ្ឍន៍សេដ្ឋកិច្ចពិភពលោកលើកទី៩ និងកិច្ចប្រជុំ​កំពូល​ថ្នាក់​ដឹក​នាំ​ធុរកិច្ច កម្ពុជា-ចិន នៅថ្ងៃទី ១៩ ខែ ឧសភា ឆ្នាំ ២០២៣ នេះថា កម្ពុជា​មាន​ទីតាំង​ស្ថិត​នៅ​ត្រង់​ចំណុច​កណ្តាល នៃតំបន់អាស៊ាន និងមានភាពប្រទាក់ក្រឡាយ៉ាងស៊ីជម្រៅ ទៅក្នុងខ្សែច្រវាក់ តម្លៃតំបន់ តាមរយៈរបៀងសេដ្ឋកិច្ចភាគខាងត្បូងនៃមហាអនុតំបន់មេគង្គ ជា​ពិសេស​ប្រទេស​កម្ពុជាស្ថិតនៅជិតចន្លោះទីក្រុងសំខាន់ ចំនួន២នៅក្នុងតំបន់ គឺទីក្រុងហូជីមិញ ប្រទេសវៀតណាម និងទីក្រុងបាងកក ប្រទេសថៃ ដែលទីក្រុងទាំងពីរនេះ កំពុងមានសកម្មភាព សេដ្ឋកិច្ច​រស់រវើក និងមានមជ្ឈមណ្ឌលប្រមូលផ្តុំសកម្មភាពផលិតជាច្រើន ដែល​អាច​ធ្វើ​ឱ្យ​ប្រទេស​កម្ពុជា ក្លាយជាទីតាំងដ៏ល្អបំផុត សម្រាប់រោងចក្រផលិតកម្ម ដែល​ផ្គត់​ផ្គង់​ដល់​រោង​ចក្រ​នៅ​ប្រទេស​ថៃ និងវៀតណាម​។

ជាមួយនឹងសក្តានុពល និងឧត្តមភាពប្រៀបធៀបរបស់ខ្លួន កម្ពុជាបាន​កំពុង​រៀបចំ​សម្រប​ខ្លួន​យ៉ាង​ប្រុង​ប្រយ័ត្ន ក្នុងការដោះ ស្រាយបញ្ហាប្រឈមមួយចំនួន ដែលអាច​នឹង​កើត​ចេញ​ពី​ការ​ប្រែប្រួល នៃនិន្នាការតំបន់ និងសកល ដូចជា ការប្រកួតប្រជែង ភូមិសាស្ត្រ នយោបាយ, ការ​គាំពារ​និយម, ការបន្ទច់បង្អាក់ចរន្តនៃខ្សែច្រវាក់តម្លៃ និងផលិតកម្មសកល, សង្គ្រាមពាណិជ្ជកម្ម និង​បច្ចេក​វិទ្យា, ការប្រែប្រួលអាកាសធាតុ, បញ្ហាសម្ពាធអតិផរណាកើតចេញពីវិបត្តិថាមពល ដែល​ជា​ផលវិបាកនៃការដាក់ទណ្ឌកម្មសេដ្ឋកិច្ច ទៅវិញទៅមករបស់ប្រទេសមហាអំណាច ពាក់ព័ន្ធ​នឹង​វិបត្តិសង្គ្រាមនៅអ៊ុយក្រែន។ ក្នុងក្របខណ្ឌការងារវិនិយោគ ក្រុម​ប្រឹក្សា​អភិវឌ្ឍន៍​កម្ពុជា បាន​បំពេញ​ការងារ​យ៉ាង​សស្រាក់​សស្រាំ​ដោយ​មាន​ការ​សហការ​ពិ​គ្រោះ​យោបល់​យ៉ាង​ហ្មត់​ចត់ ជាមួយក្រសួងស្ថាប័នពាក់ព័ន្ធ ដើម្បី បញ្ចប់​សេចក្តី​ព្រាង​អនុ​ក្រឹត្យ​ស្តីពី​ការ​អនុវត្ត​ច្បាប់​ស្តីពី​វិនិយោគ នៃព្រះរាជាណាចក្រកម្ពុជា ដែលបានប្រកាសឱ្យប្រើនាពេលកន្លងមក។

ឯកឧត្តម បន្តឲ្យដឹងថា ចំពោះពាក់ព័ន្ធការរៀបចំសេចក្ដីព្រាងច្បាប់ ស្តីពីតំបន់សេដ្ឋកិច្ចពិសេស បច្ចុប្បន្នបានដាក់ចូលក្នុង នីតិវិធីជាបន្តបន្ទាប់ ដើម្បីស្នើសុំការអនុម័ត និង​ដាក់​ឱ្យ​ប្រើ​ប្រាស់​នៅ​ពេល​ខាង​មុខ។ ច្បាប់នេះនឹងចូលរួមពន្លឿនការធ្វើពិពិធកម្ម សេដ្ឋកិច្ចកម្ពុជាឱ្យកាន់តែសម្បូរបែប ការ​ជំរុញ​ការ​តភ្ជាប់ និងការបង្កើតកម្រងឧស្សាហកម្មជាដើម។ បច្ចុប្បន្នការ         វិនិយោគ​នៅ​កម្ពុជា ពិសេសគម្រោងវិនិយោគនៅក្នុងតំបន់សេដ្ឋកិច្ចពិសេសកំពុងពង្រីក និង​ធ្វើ​ពិពិធកម្ម​ទៅ​លើ​វិ​ស័យផ្សេង​ៗ​ ជាច្រើនទៀតដូចជា វិស័យអេឡិចត្រូ និក, គ្រឿ​ង​បង្គុំ​រថយន្ត​ផលិត​កម្ម​កង់​រថយន្ត​គ្រប់ប្រភេទ, គ្រឿងសង្ហារឹម, សូឡា, កង់, សម្ភារៈតាំងលទ្ឋបុណ្យណូអែល និងផលិតផល ផ្សេង​ៗ​ទៀត សម្រាប់នាំចេញទៅកាន់ទីផ្សារបរទេស។

ឯកឧត្តម ជា វុទ្ធី បានបញ្ជាក់ថា វិស័យទាំងអស់ខាងលើនេះ កំពុងជំរុញ​កា​រ​ធ្វើ​ពិពិធកម្ម​សេដ្ឋកិច្ច​កម្ពុជា ឱ្យមានកំណើនប្រកប ដោយចីរភាព និងភាពធន់នឹងវិបត្តិ ដោយ​មិន​ពឹង​ផ្អែក​តែ​ទៅ​លើ​វិស័យ​កាត់ដេរផលិតស្បែកជើង និងកាបូបទាំងស្រុងឡើយ។ តំបន់សេដ្ឋ កិច្ចពិសេស គឺ​ជា​យន្តការ​ដ៏​មាន​ប្រសិទ្ធភាពក្នុងការទាក់ទាញវិនិយោគ ក្នុងវិស័យមិនមែនសម្លៀកបំពាក់ និង​ស្បែក​ជើង ដោយសារការ ផ្តល់នូវហេដ្ឋារចនាសម្ព័ន្ធចាំបាច់សម្រាប់ប្រតិបត្តិការវិនិយោគ និង​សេវា​ច្រក​ចេញ​ចូល​តែមួយនៅក្នុងតំបន់ ព្រមទាំងលក្ខណៈផ្សេងទៀត របស់តំបន់ដូចជា កត្តាសុវត្ថិភាព ទំនុក​ចិត្ត ការគ្រប់គ្រងបានល្អពាក់ព័ន្ធនឹងបញ្ហាកម្មករជាដើម៕ អត្ថបទ៖ សុន រ៉ាឌី