ក្រុមមេដឹកនាំយោធាមីយ៉ាន់ម៉ានិយាយថា បច្ចុប្បន្នមនុស្សយ៉ាងហោច ១៤៥នាក់ បាន​បាត់​បង់​ជីវិត​នៅ​ក្នុងប្រទេសមួយនេះ ដោយសារព្យុះស៊ីក្លូន Mocha។ 

ពួកគេនិយាយថា ភាគច្រើននៃជនរងគ្រោះដោយសារព្យុះស៊ីក្លូន Mocha ដែល​បាន​បោក​បក់​មក​ដល់​ដី​គោក​កាលពីថ្ងៃអាទិត្យសប្តាហ៍មុន មកពីតំបន់ជនជាតិភាគតិចរ៉ូហ៊ីងយ៉ា។ 

អង្គការសហប្រជាជាតិ(UN)បាននិយាយថា មនុស្សប្រហែល ៨០ម៉ឺននាក់ បាន​រង​ផល​ប៉ះពាល់​ដោយ​សារ​តែ​ព្យុះ​ដ៏​ខ្លាំង​ក្លាមួយនេះ។ 

ជាមួយនឹងកម្លាំងខ្យល់បក់ ២០៩គ.មក្នុង១ម៉ោង ព្យុះស៊ីក្លូន Mocha ដែល​ត្រូវ​បាន​គេ​ចាត់​ទុក​ថា​ជា​ព្យុះប្រភេទទី ៥ បានបោកបក់លើរដ្ឋ Rakhine ស្ថិតនៅតំបន់ភាគខាងលិចមីយ៉ាន់ម៉ា ក៏ដូច​ជា​តំបន់ Sagaing និងតំបន់ Magway។ 

របបសឹកយោធា និយាយនៅក្នុងសេចក្តីថ្លែងការណ៍ថា មនុស្សសរុបទាំងអស់ ១៤៥នាក់ បាន​ស្លាប់​អំឡុង​ពេល​ព្យុះ Mocha ។ នៅក្នុងចំណោមជនរងគ្រោះ គឺជាទាហាន ៤នាក់ ក្រុមអ្នកស្រុក ២៤នាក់ និងមនុស្ស ១១៧នាក់មកពីតំបន់ជនជាតិភាគតិចរ៉ូហ៊ីងយ៉ា៕ អត្ថបទ៖ សារ៉ាត់